He Aratohu mā ngā Kaitono

Ka whakarato tēnei pukapuka i te mōhiohio e hiahia koe hei kaitono ā-rohe i te pōtitanga whānui o te tau 2017, ā, kei roto he mōhiohio mō:

  • te tū hei hei kaitono
  • te tuhituhi kaute me te pūrongo i ngā moni takoha me ngā utu pōtitanga
  • ngā ture whakahau pōtitanga  
  • ngā ture mō te rā pōti

He aha ngā mea hōu i tēnei pōtitanga?

Ka whakarerekētia te pōti tōmua i tēnei pōtitanga. Ka whakakāhoretia te mahi whakahau i roto i ngā wāhi pōti tōmua, i roto o te 10 mita rānei o te tomokanga ki te wāhi pōti tōmua. Ka āhua poto ake anō te wā pōti tōmua. Ka tīmata tēnei wā ētahi rā 12 i mua o te rā pōti, engari ka roa ake ngā wā tuwhera, ā, ka wātea mai te ratonga pōti tōmua ā te Rātapu i mua o te rā pōti. Nā te tipu o te nui o ngā pōti tōmua tērā pea ka tīmata wawe ake te tatau o ngā pōti tōmua i te tari matua o te Āpiha Whakahoki Pōti. Ka āta whakamāramatia ēnei rerekētanga i roto i tēnei pukapuka.

Ngā rā matua mō te kaitono

23 Pipiri Ka tīmata te wā whakarite Te wā toru marama i mua o te rā pōti e pā ai ngā tepe utu pōtitanga o te kaitono mō ngā pānui ka whakaputaina i roto i tēnei wā
22 Hōngongoi Ngā tohu pōtitanga Ka whakaaetia e ngā ture motuhake kia tū he tohu ki te 3 mita pūrua rā anō te rahi mai o taua rā, i raro anō i ngā ture mana ā-rohe mō te wāhi tū
23 Hereturikōkā Rā karanga pōtitanga Ka tīmata te pāhotanga kaitono mā te pouaka whakaata me te reo irirangi
24 Hereturikōkā Ka tīmata te wā kōharinga Ka taea ngā kōharinga kaitono te tāpae ki te Āpiha Whakahoki Pōti me ngā kōharinga whakatōpū o ngā kaitono, ka taea hoki ngā rārangi rōpū te tāpae ki Te Kaitiaki Take Kōwhiri
Poupoutanga o te rā o 28 Hereturikōkā Te poupoutanga o te rā o mua o te rā kōharinga Te rā kati mō ngā hēkeretari rōpū kia tāpae i te rārangi kōharinga kaitono whakatōpū me te rārangi rōpū
Poupoutanga o te rā o 29 Hereturikōkā Rā kōharinga Hei te poupoutanga o tēnei rā me tāpae rawa e ngā kaitono katoa ō rātou kōharinga
6 Mahuru Ka tīmata te pōti i tāwāhi  
11 Mahuru Ka tīmata te pōti tōmua  
22 Mahuru Rā o mua o te rā pōtitanga Mutunga o te wā whakarite. Me tango e koe ngā tohu whakahau katoa i mua i te weheruatanga o te pō
23 Mahuru Te rā pōti Ka pōti ngā kaipōti i waenganui i te 9 i te ata me te 7 i te ahiahi. Kāore e whakaaetia te whakahau i te rā pōti
7 Whiringa-ā-nuku Ngā otinga whaimana 2 i te ahiahi te wā whāinga mō te whakapuakanga otinga whaimana
12 Whiringa-ā-nuku Whakahokinga o te tuhinga karanga pōtitanga me te whakapuakanga o ngā MP o te rārangi Tēnei te rā e whakahokia ai te tuhinga karanga pōtitanga e whakaatu ana ngā kaitono rohe pōti angitu, me te whakapuakanga o te pōtitanga o ngā mema rārangi (nā rā ki te kāhore he whakawā tatau anō)
23 Kohitātea 2018 Rā whakahoki mō ngā utu pōtitanga me ngā takoha a te kaitono      

 

File attachments: 
Promote to MegaMenu: 

Wāhanga 1: Te kōharinga kaitono

E whakamārama ana tēnei wāhanga i ngā ture o te Ture Pōti 1993 mō te kōharinga o ngā kaitono rohe pōti me ngā kaitono rārangi, tae ki te hunga e tika ana kia tū hei kaitono, te wā o te kōhari me ngā ture rerekē e pā ana ki ngā kōharinga takitahi, kōharinga whakatōpū hoki.

Ngā karere matua

Ko te wā kati mō te kōharinga takitahi ko te poupoutanga o te rā o te 29 Hereturikōkā.
Ko te wā kati e pā ana ki te kaitono rārangi rōpū me ngā kōharinga whakatōpū mā ngā hēkeretari rōpū rēhita ko te 28 Hereturikōkā.
Kāore e taea he kōharinga te whakatahi i muri o te poupoutanga o te rā kōharinga (poupoutanga o te rā 29 Hereturikōkā).

Ngā momo kaitono

E rua ngā momo kaitono i raro i te pūnaha pōtitanga whirirua (MMP):

  • ngā kaitono ā-rohe e tū ana i roto i ngā rohe pōti, me
  • ngā kaitono ā-rārangi kei ngā rārangi rōpū tōrangapū ka pōtitia pea mā te pōti rōpū.

Ka taea e te kaitono te tū mō te rohe pōti, mō te rārangi rōpū hoki i te pōtitanga kotahi.

Māraurautanga o te kaitono

Mō te tū hei kaitono me:

  • rēhita koe hei kaipōti
  • noho koe hei kirirarau o Aotearoa, ā,
  • kaua koe e whakatupea i te rēhitatanga hei kaipōti.

Ko ngā pūtake nui mō te whakatupe i te rēhitatanga e whai pānga ki te tū hei kaitono ko ēnei:

  • he kirirarau nō Aotearoa e noho ana i waho o Aotearoa, kāhore nei i tae mai ki Aotearoa i ngā tau tōmuri e toru
  • kei te whakarite whiunga i te whare herehere.

Ka pā ētahi aweretanga ki ēnei ture, hei tauira, mō ngā kaimahi kāwanatanga, ngā toa o Te Ope Tauā kei tāwāhi e mahi ana, tae atu ki ō rātou whānau.

Tērā anō ētahi atu take whakatupe ka pā ki ētahi tāngata tokoiti. [Mō ētahi atu kōrero, tirohia te wāhanga 80 o te Ture Pōti]

Ehara te kaihau (pēkerapu) i te take whakatupe.

Mēnā i whānau mai koe i tāwāhi, ka tono i a koe te taunakitanga me tō pepa kōharinga he kirirarau koe nō Aotearoa (pēnei i tētahi tiwhikete kirirarau, he tārua rānei o tō uruwhenua o Aotearoa).

Ko hea tū ai ngā kaitono?

Ka taea e koe te tū:

  • ki tētahi rohe pōti rerekē ki tērā i rēhitatia koe hei kaipōti
  • ki tētahi rohe pōti, me te rārangi rōpū, i te wā kotahi, tērā rānei
  • ki tētahi tūru rohe pōti Māori, tūru rohe pōti whānui rānei ahakoa tō iwi, momo mātāwaka rānei.

Kāore e āhei koe te tū ki neke atu i te rohe pōti kotahi, rārangi rōpū kotahi rānei.

Te kōharinga o ngā kaimahi kāwanatanga, ērā mea

Ka taea te kōhari i a koe hei kaitono ahakoa he kaimahi kāwanatanga koe, he mema poari o tētahi hinonga Kāwanatanga, he tumuaki rānei o tētahi kamupene Kāwanatanga.

Ka pā ētahi ture motuhake ki ētahi kaimahi kāwanatanga ka tū hei kaitono.

Ina he kaimahi kāwanatanga koe, kia āraia te tūpono o te kaupapa papā, pono rānei, pōhewa rānei, ka hiahiatia e te Ture Pōti kia whakawātea koe i te mahi mai i te rā kōharinga tae ki te rā tuatahi i muri i te rā pōti.

Ka hiahia pea he kaitukumahi kia whakawātea he kaimahi kāwanatanga i mua i te rā kōharinga ki te whakaaro ia me pēnei i runga i ngā kawenga o te kaitono hei kaimahi kāwanatanga. Ki te pōtitia ia, ka tirohia te kaimahi kāwanatanga kua wehe i tōna tūranga i te rāngai kāwanatanga.

E tūtohu ana mātou kia matapaki koe i tō kōharinga ki tō kaitukumahi, me pānui hoki i ngā aratohu ka whakaputaina e Te Kōmihana o ngā Tari Kāwanatanga/State Services Commissioner (SSC) (tirohia www.ssc.govt.nz).

Te kōhari kaitono rohe pōti

E rua ngā huarahi mō te kōhari i ngā kaitono rohe pōti:

Ngā kōharinga whakatōpū

Nā ka tuku te hēkeretari o tētahi rōpū rēhita i te rārangi kōharinga whakatōpū o ngā kaitono katoa e tū ana mō te rōpū ki te Kaitiaki Take Kōwhiri i Te Whanganui-a-Tara. Tēnei te tikanga māmā rawa mō tētahi rōpū rēhita, e whakamahia e te nuinga o ngā rōpū.

Ngā kōharinga takitahi

Ko te kōharinga tēnei o tētahi kaitono nā ngā kaipōti tokorua rēhita ki te rohe pōti, mā te tāpaenga puka kōharinga takitahi ki te Āpiha Whakahoki Pōti o taua rohe pōti. Ka pānuitia ngā tono kōharinga ki ngā nūpepa, ā, ka whakaatuhia anō ngā mōhiohio i www.elections.org.nz.

Ka taea e te rōpū rēhita tētahi o ēnei tikanga te whakamahi, kāhore ia ngā mea e rua. Kāore e taea e te rōpū kāore i rēhita te whakamahi i te tikanga kōharinga whakatōpū.

Ngā kōharinga whakatōpū

Me mātua tuku hāngai atu e ngā hēkeretari o ngā rōpū tōrangapū ngā rārangi kōharinga whakatōpū ki te Kaitiaki Take Kōwhiri i Te Whanganui-a-Tara. Ko te wā whakamutunga hei tāpae i tētahi rārangi kōharinga ko te poupoutanga o te rā i mua o te rā kōharinga (te poupoutanga o 28 Hereturikōkā).

Ki te whakarite he rōpū ki te kōhari i āna kaitono mā te kōharinga whakatōpū, e kore e whakaae ngā Āpiha Whakahoki Pōti ki te kōharinga takitahi mō ngā kaitono e tū ana mō te rōpū.

Me kōrero koe ki te hēkeretari o tō rōpū mō ēnei take e whai nei:

  • ngā taipitopito e hiahia ana koe kia whakaurua ki te rārangi kōharinga. Kei taua rārangi he pūkete o te rohe pōti e whakataetae ana koe, tō ingoa katoa, te ingoa e hiahia ana koe i runga i te pepa pōti ina rerekē i tō ingoa katoa (tae ki te 30 pūāhua te roa), me te rohe pōti kua rēhita koe
  • tō whakaaetanga kia tū hei kaitono. E wātea ana te puka whakaaetanga kōharinga i te hēkeretari o tō rōpū, māna anō tēnei e āpiti ki te kōharinga whakatōpū, me
  • te moni tāpui me tāpae tahi me te rārangi kōharinga. Me tuku e te hēkeretari o te rōpū te moni tāpui $300 mō ia kaitono kei roto i te rārangi kōharinga.

Ngā kōharinga takitahi

Ka pā tēnei ki a koe mēnā:

  • he kaitono rohe pōti koe e tū ana mō tētahi rōpū rēhita kāore i te tāpae kōharinga whakatōpū
  • he kaitono mō tētahi rōpū tōrangapū kāore i rēhita, tērā rānei
  • e tū ana koe hei kaitono motuhake.

Mā ngā kaipōti rēhita tokorua i te rohe pōti e tū ana koe, e kōhari i a koe. Kāore koe e āhei ki te kōhari i a koe anō.

Kia pēnei tō kōharinga:

  • me tuhi ki te puka kōharinga takitahi (me whai i te rārangi arowhai i muri o te puka),
  • me tāpae tahi me te moni tāpui $300 (moni uka, pepa pēke, haki pēke rānei). Kāore e whakaaetia ngā haki whaiaro. Me tuhi te pepa pēke, haki pēke rānei ki a “Electoral Commission Trust Account”. Tirohia hoki te Wāhanga 3 mō te mōhiohio e pā ana ki te whakahokinga moni tāpui, ā,
  • me tuku ki te Āpiha Whakahoki Pōti i mua i te poupoutanga o te rā kōharinga (29 Hereturikōkā).

Ka āhei ngā Āpiha Whakahoki Pōti ki te whiwhi kōharinga mai i te rā karanga pōtitanga. E tūtohu ana mātou kia tāpae ā-tinana koe i tō kōharinga, tōmua rawa, kaua e tatari ki te rā kōharinga. Nā ka whai wā te Āpiha Whakahoki Pōti ki te tirotiro i tō kōharinga kia āta mōhio ai kei te tika katoa. Kāhore he mana o te Āpiha Whakahoki Pōti kia tōroa ake te wā kati ā-ture o te poupoutanga o te rā kōharinga.

Me kōrero e koe ngā uauatanga e tae ōkiko ai tō kōharinga me te moni tāpui ki te Āpiha Whakahoki Pōti kia kite i ngā whakaritenga me mahi, ina taea.

Ka hiahiatia kia tohu e koe ki te puka kōharinga mehemea he kaitono ā-rōpū koe, he kaitono motuhake rānei. Mehemea he kaitono koe mō tētahi rōpū kāore i rēhita, me hoatu ki te Āpiha Whakahoki Pōti he taunaki (pēnei i te kaupapa ture o te rōpū) he pono tonu tō rōpū, me te taunaki e āhei ana koe te tū mō taua rōpū (pēnei i te reta mai i te hēkeretari o te rōpū).

Ki te tū koe mō tētahi rōpū rēhita, otirā he moko rēhita tō te rōpū ki te Kōmihana, ka puta te moko o te rōpū ki te taha ki tō ingoa i te pepa pōti. Ko ngā rōpū rēhita anake ka whai moko rēhita.

Te kōhari i ngā kaitono rārangi

Me tuku rawa ngā hēkeretari o ngā rōpū tōrangapū rēhita i ngā rārangi ingoa o ngā rōpū ki te Kaitiaki Take Kōwhiri i mua i te poupoutanga o te rā i mua o te rā kōharinga (28 Hereturikōkā).

Mēnā he kaitono rārangi koe, me kōrero koe ki te hēkeretari o tō rōpū mō ēnei take:

  • ō taipitopito kōrero ka tuhia ki te rārangi, tae ki tō ingoa, wāhi noho, me tō tau waea, otirā
  • tō whakaaetanga kia tū hei kaitono rārangi. Ka wātea te puka whakaaetanga i te hēkeretari o tō rōpū.

Ko te kaitono e whakataetae ana he rohe pōti me te rārangi, e āhei ana te tohu tōna whakaae ki ēnei mea e rua i te puka whakaae kotahi.

Te whakatahi kōharinga

Mēnā i kōharia koe mā te kōharinga whakatōpū, i whakaae rānei kia whakaurua koe ki te rārangi rōpū mā te hēkeretari o tō rōpū, engari e hiahia ana ki te whakatahi, me mahi tēnei i mua o te poupoutanga o te rā 29 Hereturikōkā. Me kōrero wawe koe ki te hēkeretari o tō rōpū. Me whakakī e koe te puka whakatahi kōharinga i te rārangi kōharinga whakatōpū.

Mēnā i hāngai te kōhari takitahi i a koe ki te Āpiha Whakahoki Pōti o tō takiwā, me anga koe:

  • ki te whakakī he puka whakatahi i te kōharinga takitahi (me tiki i te Āpiha Whakahoki Pōti)
  • ki te haina taua puka i mua i tētahi Kaiwhakawā Tūmatanui, rōia rānei, ā,
  • ki te whakahoki i te puka kua haina ki te Āpiha Whakahoki Pōti i mua tonu o te poupoutanga o te rā kōharinga (29 Hereturikōkā).

Kāore e taea te whakatahi i tētahi kōharinga i muri o te poupoutanga o te rā kōharinga.

Te matenga, ngoikoretanga rānei o te kaitono

Kei te Ture Pōti ētahi tukanga me whai ina mate, ina ngoikore rānei he kaitono i mua i te rā kōharinga, i waenganui rānei o te rā kōharinga me te whakapuakanga o te otinga whaimana.

Ki te pēneitia he kaitono i te rārangi rōpū, i te rārangi kōharinga whakatōpū rānei, me whakapā wawe te hēkeretari o te rōpū ki te Kaitiaki Take Kōwhiri, me whakakī hoki he tono hei whakakāhore i te kōharinga kaitono mō te take ngoikoretanga (ina ngoikore).

Mēnā he kōharinga takitahi te kaitono, me whakapā wawe ōna kaikōhari ki te Āpiha Whakahoki Pōti ka whakakī i te puka hei whakakāhore i te kōharinga o te kaitono (ina ngoikore).

Ingoa kaitono

Ka taea he tangata te kōhari i raro i te ingoa kei tana tiwhikete whānau, te ingoa i tapa ki a ia mā tētahi whakatau whāngai, he ingoa i tango ā-ture ia, he ingoa rānei i mōhiotia whānuitia ai ia i ngā marama 12 i mua. Hei tauira, e āhei ana te kaitono i mōhiotia whānuitia ko Mike Young ki te whakamahi i tēnei ingoa ahakoa ko Michael Young tōna ingoa katoa ā-ture.

Kāore e whakaaetia ngā taitara me ngā ingoa whakahōnore.

Te raupapa kaitono i te pepa pōti

Ka raupapatia ngā kaitono mā te tātai reta o te ingoa whānau ki te taha matau o te pepa pōti me tētahi moko rēhita ki matau o te ingoa (te pōti rohe).

Ina whakataetae tō rōpū i te pōti rōpū, ka tāia te ingoa o tō rōpū anganui atu i tō ingoa ki te taha mauī o te pepa pōti (te pōti rōpū).

Ina he kaitono motuhake koe, ka waiho kia pātea te wāhi taha mauī o te pepa pōti, anganui atu i tō ingoa.

Ko ngā rōpū e whakataetae ana i te pōti rōpū, kāhore ia te pōti rohe, ka raupapatia mā te tātai reta ki te taha mauī o te pepa pōti, i muri i ngā rōpū e whakatū ana he kaitono.

Te whakaputanga o te mōhiohio kaitono

Ka wātea ngā puka kōhari mō te takitahi hei tirotiro tūmatanui mā ngā kaipōti rēhita o te rohe i te tari matua o te Āpiha Whakahoki Pōti.

Ka oti ngā kōharinga me ngā rārangi rōpū te tukatuka i muri i te rā kōharinga, ka whakaputaina e mātou ngā ingoa o ngā kaitono ki www.elections.org.nz. Kāore mātou e tā te mōhiohio koioranga, ngā kaupapahere, ngā tau waea, ngā wāhitau īmēra rānei.

Ka tono tikanga noa ai te hunga pāpāho i te nama waea, ngā taipitopito whakapā īmēra rānei o ngā kaitono, ā, ka hoatu e mātou engari ia ki te kī mai koe, tō hēkeretari rōpū rānei kia kaua e hoatu.

Ngā wā whakaako kaitono

I muri tata noa o te katinga o ngā kōharinga, ka whakaako tō Āpiha Whakahoki Pōti i a koe ki te tukanga pōtitanga me ō kawenga hei kaitono i te pōtitanga. Me haere koe, me tono māngai rānei mōu. I aua wā, ka wātea mai ngā mōkī mōhiohio kei roto anō ētahi rauemi rerekē.

Whakapā ki te Āpiha Whakahoki Pōti mō te mōhiohio e pā ana ki te rā me te wā o te whakaako kaitono.

Promote to MegaMenu: 

Wāhanga 2: Ngā ture whakahau

Hei āwhina tēnei wāhanga kia mātau koe ki ngā whakaritenga o te Ture Pōti 1993 me te Ture Pāhotanga 1989 ka pā ki ngā kaitono i tētahi pōtitanga pāremata.

Ngā kōrero matua

Me whai tauākī kaiwhakatairanga ngā pānuitanga pōti.
Ka taea ngā pānuitanga pōti (i tua atu i ngā hōtaka pōtitanga i te pouaka whakaata me te reo irirangi) te whakaputa i tētahi wā ahakoa, kāhore ia te rā pōti (23 Mahuru).
Ka taea anake ngā hōtaka pōtitanga te pāpāho i te irirangi me te pouaka whakaata mai o te rā karanga pōtitanga (23 Hereturikōkā) tae ki te rā i mua i te rā pōti (22 Mahuru).
Ka āhei ētahi atu te whakatairanga i tētahi kaitono, rōpū rānei, me tō rātou whakaae ā-tuhi anake.
He toihara te whakahau pōti i te rā pōti.

Ngā tauākī kaiwhakatairanga

Hei roto i ngā pānuitanga pōti katoa, ahakoa te wā whakaputa, te ingoa me te wāhi noho o te tangata nāna aua pānuitanga i kōkiri (‘te kaiwhakatairanga’). [Tirohia te wāhanga 204F o te Ture Pōti]

Ko ngā kupu e tūtohu ana te Kaitiaki Take Kōwhiri ko:

I whakatairanga, i whakamana rānei e [ingoa], [wāhi noho tōtika].

He toihara te kore whakauru i tētahi tauākī kaiwhakatairanga, ā, hei te $40,000 rā anō pea te whiu.

E pā ana te whakaritenga mō tētahi tauākī kaiwhakatairanga ki ngā momo pānuitanga pōti katoa ahakoa te momo. Ina whakaputaina he pānuitanga pōti hei mea kite, me kite mārama tonu te tauākī kaiwhakatairanga i roto i te pānuitanga. Ina whakaputaina te pānuitanga pōti hei momo ororongo anake, kia kaua e iti iho te rongo i te tauākī kaiwhakatairanga i ērā atu kōrero o te pānuitanga.

Mēnā kua āta whakakitea he tauākī kaiwhakatairanga ka whakatauria tā tēnā, tā tēnā mā te whakaaro ki te momo pānuitanga ka whakaputaina.

Hei tā te Kaitiaki Take Kōwhiri, kāore e hiahiatia kia āhei he tangata te pānui i te tauākī kaiwhakatairanga mai i te wāhi e tika ana kia kitea te pānuitanga pōti, hei tauira i runga papa pānuitanga ina taraiwa ana. Engari, ki te āta tirohia e te tangata he pānuitanga pōti me kite rawa ia i te tauākī kaiwhakatairanga.

Mēnā he pānuitanga pōti tētahi paetukutuku, whārangi tukutuku rānei, kāore e hiahiatia he tauākī kaiwhakatairanga ki ia pikitia, tuhinga, kōrero rānei i te pae, ina tonu kei te whārangi kāinga te tauākī kaiwhakatairanga, kei te whārangi rānei o te pānuitanga pōti.

E tohutohu ana te Kaitiaki Take Kōwhiri kia whakauru e ngā rōpū he tauākī kaiwhakatairanga ki ō rātou tohu rōpū whētui, ka kitea hoki pea ēnā hei pānuitanga pōti (tirohia te Wāhanga 4 mō ētahi atu mōhiohio mō ngā tohu rōpū whētui).

Ngā pānuitanga pōti mō te kaitono me te rōpū

Ko ngā pānuitanga kaitono mō ngā kaupapa o te Ture Pōti ka pā anake ki ngā kaitono rohe pōti, kāhore ia ki ngā kaitono rārangi. Ko te kaitono rohe pōti ko tētahi tangata kua whāki matanui ai i tōna koronga kia tū hei kaitono rohe pōti, arā, kua kōrero tōna koronga ki te nūpepa, i tētahi hui ā-iwi rānei, kua kōharitia rānei kia tū hei kaitono rohe pōti, ā, kāore i whakakāhore tōna kōharinga.

Ko ngā pānuitanga kaitono i whakatairangatia e koe hei kaitono, me whai tauākī kaiwhakatairanga kei roto anō tōu ingoa me tō wāhi noho.

Ka taea hei wāhi noho te wāhi noho ā-huarahi katoa o tō kāinga, o tētahi wāhi kē rānei e taea tikanga noa ai te whakapā ki a koe i waenganui i ngā hāora o te 9 i te ata me te 5 i te ahiahi o tētahi rā mahi. Kāore e whakaaetia he pouaka Poutāpeta noa, he paetukutuku rānei.

Hei roto pea i tēnei wāhi noho:

  • tō tari whakahau
  • te wāhi noho o te tari matua o tō rōpū, tērā rānei
  • tō wāhi noho Pāremata, i waho o te Pāremata rānei, engari anō koia tonu te wāhi e taea ai te whakapā ki a koe i waenganui i ngā hāora o te 9 i te ata me te 5 i te ahiahi o tētahi rā mahi. Me kōrero pea koe ki tō kaitukumahi i mua i te tāpiri i te wāhi mahi ki tētahi pānuitanga pōti.

I tua atu i te whakatairanga i a koe anō, ka āhei koe ki te whakatairanga i te pōti rōpū i runga i te whakamana ā-tuhi o te hēkeretari o tō rōpū, engari me wehewehe ngā utu mō tēnei i waenganui i tō pūrongo whakapaunga pōti me tō te rōpū. Me kōrero koe ki te hēkeretari o tō rōpū tōrangapū ina pērā te āhua. [Tirohia ngā wāhanga 204H, 205EA me 206CC o te Ture Pōti]

Ina whakatairangatia e koe he pānuitanga hei pānuitanga mō te kaitono me te rōpū tahi, kotahi noa te tauākī kaiwhakatairanga ka hiahiatia. I tēnei wā ko koe te kaiwhakatairanga, nā, me whai noa te pānuitanga i tōu ingoa me tō wāhi noho.

Waihoki, ko ngā pānuitanga e mahi tō rōpū ka kitea noa hei whakatairanga mō tō kaitonotanga me whai i tō whakamana ā-tuhi, me whāki hoki i tō pūrongo whakapaunga pōti. Ko ngā pānuitanga kaitono e whakatairangatia e tō rōpū, me tuhi te ingoa o te hēkeretari o te rōpū me tana wāhi noho ki te tauākī kaiwhakatairanga.

Ngā pānuitanga pōti a rōpū kē

Ka āhei ngā rōpū kē (ngā tāngata, rōpū rānei i tua atu i ngā kaitono me ngā rōpū tōrangapū, i ngā tāngata hoki e whakahaere ana i ngā mahi a tētahi kaitono, rōpū rānei) ki te whakatairanga i ngā pānuitanga kaitono, engari ka pā ētahi ture, tae ki:

  • me whakauru rawa he tauākī kaiwhakatairanga ki ngā pānuitanga katoa a rōpū kē kia kite te iwi whānui nā wai anō te pānuitanga
  • ina whakatairangatia he pānuitanga pōti e tētahi rōpū kē, me rēhita rātou ki te Kaitiaki Take Kōwhiri hei kaiwhakatairanga ina nui ake i te $12,600 āna e whakapau ki ngā pānuitanga pōti i te wā whakarite (23 Pipiri ki te 22 Mahuru)
  • ko ngā pānuitanga e whakaputa tētahi rōpū kē hei whakatairanga mōu hei kaitono, me whakamana ā-tuhi e koe. Me whakamana rawa e ia kaitono tētahi pānuitanga e whakatairanga ana i te pōtitanga o te kaitono kotahi neke atu rānei. Me whakamana rawa e te kaitono me te hēkeretari o te rōpū tētahi pānuitanga e whakatairanga ana i te kaitono me te rōpū
  • ko ngā utu o ngā pānuitanga a rōpū kē ka whakaputaina i te wā whakarite, nāu i whakamana, ka uru ki ō whakapaunga utu pōtitanga kaitono, ā, me whāki i roto i tō pūrongo whakapaunga pōti me ngā takoha (tirohia te Wāhanga 3), otirā ka uru anō ki ngā whakapaunga pānuitanga o taua rōpū.

Mō ētahi atu mōhiohio anō mō ngā ture e pā ana ki te pānuitanga nā rōpū kē, tirohia te pukapuka a te Kaitiaki Take Kōwhiri Third Party Handbook – General Elections 2017.

He aha rā he pānuitanga pōti?

Ko te pānuitanga pōti he pānuitanga i roto i ngā momo pāpāho katoa ka kīia noa ai he whakatītina, he whakatenatena i ngā kaipōti ki te:

  • pōti, kaua e pōti rānei, mō tētahi kaitono rohe pōti (ahakoa ka tuhia te ingoa o te kaitono, kāore rānei),
  • pōti, kaua e pōti rānei, mō tētahi rōpū tōrangapū (ahakoa ka tuhia te ingoa o te rōpū, kāore rānei),
  • pōti, kaua e pōti rānei, mō tētahi momo kaitono, rōpū rānei kua whakaahua mā te kōrero mō ōna whakaaro, tāna tū rānei (ahakoa ka tuhia te ingoa o te kaitono, o tōna rōpū, kāore rānei). [Tirohia te wāhanga 3A o te Ture Pōti]

Kāore te Ture Pōti e whakamārama i te kupu ‘pānuitanga’ engari, nō te mea e kapia ana e te tikanga o ngā kupu ‘pānuitanga pōti’ he pānuitanga ‘o ngā momo pāpāho katoa’, hei tā te Kaitiaki Take Kōwhiri me whānui te whakamāori i te kupu ‘pānuitanga’.

Hei tauira, kāore e rāhuitia ki ngā momo pānuitanga tuku iho pēnei i ngā nūpepa, pānui tuhi, pourewa pānui, mātārere me ngā pāhotanga reo irirangi, pouaka whakaata hoki. Kei roto anō ko te pānuitanga tuihono, ka taea hoki kia utua, kāhore rānei. Ko te whakamātautau ko mehemea ‘he tika’ kia whakaarohia te pānuitanga hei mea whakatītina, whakatenatena rānei i ngā kaipōti kia pōti, kia kaua e pōti rānei, mō tētahi rōpū, kaitono, momo rōpū, momo kaitono rānei.

He whakamātautau tōkeke tēnei ka whakatauria mā te whakaaro ki te pānga whānui o te pānuitanga. Hei runga anō te pānga o te pānuitanga i tōna ihirangi, otiia tōna momo me te kaupapa mārama, me te tika o te horopaki. Mō te pānuitanga pōti kāhore he tikanga kia whakaurua te ingoa o te rōpū, te kaitono rānei, otirā ka taea kia hāngai tonu, kia kore hāngai rānei te whakatītina me te whakatenatena kia pōti, kia kaua rānei e pōti.

Kua kī ngā kōti me mahi tēnei aromatawai i runga i te titiro o te kaimātakitaki māhaki, te tangata tairongo ki te uara nui o te kupu tōrangapū i roto i te kāwanatanga ā-iwi. (Te Kaitiaki Take Kōwhiri v Watson rāua ko Anor 2016)

Ko ngā pānuitanga pōti e whakaaro noatia he whakatītina, he whakatenatena i ngā kaipōti kia pōti, kia kaua e pōti rānei, mō tētahi kaitono rohe pōti (ahakoa tuhia te ingoa o te kaitono, kāore rānei) ka kīia he pānuitanga kaitono. Ko ngā pānuitanga pōti e whakaaro noatia he whakatītina, he whakatenatena i ngā kaipōti kia pōti, kia kaua e pōti rānei, mō tētahi rōpū tōrangapū (ahakoa tuhia te ingoa o te rōpū, kāore rānei) ka kīia he pānuitanga rōpū.

Ko ngā whakaritenga katoa mō ngā pānuitanga pōti e pā ki:

  • ngā pānuitanga pōti e whakaputaina i Aotearoa ahakoa kei waho o Aotearoa te kaiwhakatairanga e noho ana, me
  • ngā pānuitanga pōti e whakaputaina i waho o Aotearoa, ā, kei Aotearoa te kaiwhakatairanga. [Tirohia te wāhanga 3F o te Ture Pōti]

Ko te tikanga o te kupu ‘whakaputa’ ko te whakakite mea ki tētahi atu ahakoa te tikanga i whakakitea ai, hāunga ia te kōrero kanohi ki te kanohi ki te tangata kotahi neke atu rānei. [Tirohia te wāhanga 3D o te Ture Pōti]

Ngā whakawāteatanga pānuitanga pōti

E mārama ana te ture ehara ēnei i te pānuitanga pōti:

  • te ihirangi ētita
  • ngā whakaaro tōrangapū whaiaro i runga ipurangi
  • ngā kōrero whakapā a tētahi mema Pāremata.

Te ihirangi ētita

Tērā he whakawāteatanga mō ngā ihirangi ētita o tētahi whakaputanga, hōtaka reo irirangi, pouaka whakaata rānei, he pae ipurangi pāpāho rānei. Kāore e tautuhia e te Ture Pōti ‘te ihirangi ētita’ engari ko tā te Kaitiaki Take Kōwhiri ko ngā wāhi o te whakaputanga hāunga te pānuitanga, te pānui whakatairanga rānei. Ka taea i roto ko ngā wāhi whakaaro, wāhi ētita rānei nā ētahi atu i tuhi me ngā tuhinga a ngā kaipānui e kōwhiri te ētita kia whakaputa. Ko te whakaputanga ko tētahi nūpepa, maheni, hautaka rānei mō ngā kaupapa kāore e pā ki te pōtitanga, he mea whakaputa auau e wātea ana ki te iwi whānui.

Ngā whakaaro tōrangapū whaiaro i te ipurangi

Tērā he whakawāteatanga mō te whakaputanga o ngā whakaaro tōrangapū whaiaro o tētahi tangata i te ipurangi, i tētahi atu tikanga ā-hiko rānei, engari kei utu taua tangata, kei utua ia rānei mō te whakaputanga o aua whakaaro. Ko ngā tāngata e whakapuaki ana ngā whakaaro tōrangapū whaiaro i te pāpāho pāpori pēnei i a Facebook me Twitter ka kapia e tēnei whakawāteatanga, ā, kāore e hiahiatia he tauākī kaiwhakatairanga.

Kapia ai e tēnei whakawāteatanga ngā whakaaro tōrangapū āhua whaiaro. Kāore e kapia ngā whakaaro tōrangapū e whakapuakina mō tētahi rōpū, umanga, ngā whakaaro o tētahi rōpū tōrangapū rānei.

Ki te ‘pai’, ‘tiritiri’, ‘pekī anō’, ‘rangitaki anō’ rānei e tētahi tangata he pānuitanga pōti i tare ki Facebook, Twitter, tētahi atu pae pāpori rānei, ko te whakaaro o te Kaitiaki Take Kōwhiri mō te ihirangi takitahi ka puta tuihono ki wāhi kē, kāore e hiahiatia he tauākī kaiwhakatairanga ki te puta te ihirangi ki aua whārangi hei whakaaro tōrangapū whaiaro o te tangata kotahi kāore e utu, e utua rānei mō te whakaputanga o aua whakaaro.

Ngā taipitopito whakapā a ngā MP

Tērā hoki te whakawāteatanga mō te whakaputanga o ngā taipitopito whakapā a ngā MP.

Ka wātea he mōhiohio anō mō ngā MP i te pukapuka o te Kaitiaki Take Kōwhiri MP Handbook – General Election 2017.

Te tono kupu tohutohu i te Kaitiaki Take Kōwhiri

E tino pai ana mātou ki te whakarato tohutohu ki ngā kaitono. Ka taea e koe te tono tohutohu mai i te Kaitiaki Take Kōwhiri mēnā, ki tōna whakaaro, ka kitea tētahi pānuitanga hei ‘pānuitanga pōti’ i raro i te ture. Kāhore he here ā-ture o te whakaaro o te Kaitiaki Take Kōwhiri, engari he whakamāramatanga noa tērā o te ture nā te Kaitiaki Take Kōwhiri. Tērā pea ka rerekē te titiro o tētahi kōti o te ture, nā reira me kimi tohutohu ā-ture pea koe.

Hei tono i tētahi whakaaro tohutohu, me hōmai he tārua o te pānuitanga me ngā mōhiohio takenga mai whai pānga mō te horopaki o te whakaputanga, pērā i ngā kōrero mō te wā whakaputa, te tikanga whakaputa me te nui. Ka taea te tono mā te īmēra ki advisory@elections.govt.nz. Hohoro tonu ai mātou ki te whakahoki kōrero. He whāinga mōrahi tō mātou o ngā rā mahi e 5 hei whakahoki kōrero.

Ka noho matatapu ki te Kaitiaki Take Kōwhiri te pānuitanga hukihuki, ngā rauemi tautoko, me te tohutohu i tuku ki te tangata tono tae ki te rā o muri i te rā ka whakahokia te karanga pōtitanga (13 Whiringa-ā-nuku 2017).

Ko reira wātea ai ngā kupu tohutohu ina tono, i runga tonu i te Ture Pārongo Whaimana 1982 (Official Information Act 1982). Heoi kāore te tangata tono e aukatia i te whakaputanga o aua tohutohu i tētahi wā.

Ngā moko rōpū

Ahakoa whai wāhi tō moko rōpū ki tō pānuitanga ehara i te mea he pānuitanga rōpū ia mēnā hāngai te rahi me te kōhure o te moko ki te kaupapa kia tohu i a koe hei kaitono mō te rōpū, ā, kāore tonu e kitea hei nekehanga atu i tērā. Heke rawa ana tēnei ki ngā take pēnei i te horopaki, te rahi, me te kōhure o te moko, mēnā hoki i aua āhuatanga ka kitea te whai wāhi o te moko rōpū hei whakatītina, hei whakatenatena rānei kia pōti ngā kaipōti mō te rōpū.

Mēnā he pānuitanga rōpū ka hiahiatia he whakamana ā-tuhi mai i te hēkeretari o te rōpū.

Te pānuitanga reo irirangi, pouaka whakaata rānei

Ka pā ētahi ture motuhake ki te pānuitanga reo irirangi, pouaka whakaata rānei, he rerekē tonu i ērā atu momo pānuitanga. [Tirohia te Wāhanga 6 o te Ture Pāho 1989]

Ka taea ngā pānuitanga kaitono te pāho i te pouaka whakaata, i te reo irirangi rānei i te wā e tīmata ana ki te rā karanga pōti (23 Hereturikōkā) tae ki te mutunga o te rā i mua o te rā pōti (22 Mahuru).

Hei kaitono e āhei ana koe te pānui ki te reo irirangi, ki te pouaka whakaata rānei hei whakatairanga i tō pōtitanga. Ko te utu pānuitanga he whakapaunga pōti kaitono tērā.

Kāore koe e āhei te wehewehe pānuitanga reo irirangi, pouaka whakaata rānei me tētahi/ētahi atu kaitono. Ka āhei koe ki te whakauru mōhiohio mō tō rōpū me āna kaupapahere hei whakatairanga i tōu ake pōtitanga. Heoi anō, kāore e taea e koe te tātā i ngā kaupapahere ā ētahi atu rōpū, kaitono rānei.

Kāore e āhei ngā pāhotanga kaitono te whakatītina i ngā kaipōti kia tukua tāna pōti rōpū ki te rōpū i te mea ka hurihia ki te pāhotanga rōpū e pā ai ngā ture motuhake.

Hei tauira, tērā e kī pea tētahi pānuitanga reo irirangi, pouaka whakaata rānei:
“Me tohu i a Hohepa Mea, tō kaitono Rōpū Y mō te Tāone o Pōneke.”

Me kaua ia e kī:
“Me tohu i a Hohepa Mea, tō kaitono Rōpū Y mō te Tāone o Pōneke, me hoatu hoki ki te Rōpū Y tō pōti rōpū.”

Ka whakahaeretia te pāhotanga rōpū tōrangapū i raro i tētahi tikanga whakahaere kē, he mea tohatoha te moni pāpāho nā te Kaitiaki Tāke Kōwhiri.

Me whai tauākī kaiwhakatairanga ngā pāhotanga katoa o ngā pānuitanga pōti.

Me āta whakaaro ngā kaitono mehemea ka taka he pāhotanga e mea ai rātou ki raro i te tikanga ‘hōtaka pōtitanga’ mō ngā kaupapa o te Ture Pāho.
Ka whakamāramatia he ‘hōtaka pōtitanga’ pēnei “he hōtaka —

(a) ka akiaki, ka whakatenatena rānei, ka tirohia rānei hei akiaki, hei whakatenatena i ngā kaipōti kia pōti mō tētahi rōpū, mō tētahi kaitono rohe pōti rānei; tērā rānei

(b) ka akiaki, ka whakatenatena rānei, ka tirohia rānei hei akiaki, hei whakatenatena i ngā kaipōti kia kaua e pōti mō tētahi rōpū, mō tētahi kaitono rohe pōti rānei; tērā rānei

(c) ka aki i te tautoko mō tētahi kaitono rohe pōti, rōpū rānei; tērā rānei

(d) ka whakahē i tētahi kaitono rohe pōti, rōpū rānei; tērā rānei

(e) ka pānui haere i ngā hui kua tū, ka tū rānei e pā ana ki te pōtitanga.”

Kei roto ko “ngā atahanga kite, ahakoa whai oro, kāhore rānei, ko tōna nuinga he kuputuhi retawhika.”

E kī ana ngā kōti, e pā noa ana ngā ture hōtaka pāho pōtitanga o te Ture Pāho ki ngā pāhotanga nā ngā rōpū me ngā kaitono tōrangapū anake i kōkiri, kāhore ia, hei tauira, ngā pāhotanga nā rōpū kē, ngā hōtaka rānei i tīpako ngā kaipāho, arā, te ihirangi ētita, ngā rongo, te whaikupu, ngā take o te wā, te whakangahau, te pakipūmeka, ērā mea. (Te Kaitiaki Take Kōwhiri v Watson rāua ko Anor 2016)

Ngā nūpepa me ētahi atu pānuitanga

Ka āhei ngā momo pānuitanga i tua atu o te reo irirangi me te pouaka whakaata, ki te whakatairanga i tētahi kaitono me ngā kaupapahere o tōna rōpū, te whakahē rānei i tētahi atu kaitono me ngā kaupapahere o tōna rōpū.

He whakapaunga pōti ngā utu pānuitanga nūpepa me ērā atu momo whakatairanga pērā i ngā pourewa pānui.

Te kōrero ā-waha me te rangahau

Ko ngā ture e pā ana ki te whakaritenga mō tētahi tauākī kaiwhakatairanga me ngā whakapaunga pōti ka pā ki ngā pānuitanga pōti ka ‘whakaputaina’. Heoi, kāore e uru ki te tikanga o te kupu ‘whakaputa’ te kōrero ā-waha tonu ki tētahi, ētahi tāngata rānei.

Ko tōna tikanga, kei waho te kōrero ā-waha i te whakaritenga mō te tauākī kaiwhakatairanga, ā, kāore e uru ki ngā whakapaunga pōti.

Hei ōna ihirangi e kīia ai te kōrero ā-waea, te rangahau rānei he pānuitanga pōti, kāore rānei. He whakawāteatanga mārama tā te Ture Pōti mō ngā rangahau me te rapunga whakaaro ki te tikanga o te whakapaunga pōti, heoi, ehara i te mea ka whakawātea aunoatia ngā mea katoa ka whakaputaina ki te hōputu rangahau. Ki te neke te rangahau ki tua o te rapunga whakaaro i ngā kaipōti, kia tirohia noatia hei whakatītina, hei whakatenatena rānei i ngā kaipōti kia pōti, kia kaua e pōti rānei mō tētahi kaitono rohe pōti, mō tētahi rōpū tōrangapū rānei (ka kīia ai he ‘rangahau pana’), kāti he pānuitanga pōti ia.

Ki te whakatairanga ngā pātai rangahau i a koe, i ngā kaupapahere rānei a tō rōpū, ina ārahi rānei ngā pātai, ina tohutohu ki ngā whakautu, kāti ka tirohia te rangahau hei pānuitanga pōti, nā, me ū ki ngā ture pānuitanga pōti.

E pai ana mātou ki te arotake i tētahi tuhinga hukihuki, tētahi rangahau rānei me te tuku whakaaro mēnā he pānuitanga pōti, pānuitanga kaitono, pānuitanga rōpū hoki/rānei.

Ngā paetukutuku me ngā pāpāho pāpori

Ina whakamahi he kaitono, he rōpū, he rōpū kē rānei i tētahi paetukutuku, tae ki YouTube, Facebook, Twitter, he pāpāho pāpori kē rānei, hei whakapuaki i ngā whakaaro tōrangapū o te rōpū, o rōpū kē rānei, kāore tonu e pā te whakawāteatanga mō ngā whakaaro tōrangapū whaiaro.

Kia whakatau mehemea he pānuitanga pōti tētahi paetukutuku, whārangi pāho pāpori rānei, ka titiro te Kaitiaki Take Kōwhiri ki te ihirangi whānui o te pae, o te whārangi rānei. Ka taea kia maha ngā whārangi o te paetukutuku kaitono kei roto anō, hei tauira, te mōhiohio mō te kaitono me ōna kaupapahere, me pēhea e tūao, e tuku takoha rānei ki te kaitono. Ina kei te paetukutuku kaitono he ihirangi ka tirohia noatia hei whakatītina, hei whakatenatena rānei i ngā kaipōti ki te pōti mō te kaitono, mō tōna rōpū rānei, kāti he pānuitanga pōti te paetukutuku katoa.

Ka pēnei hoki te āhua ina tirohia ana te pāpāho pāpori. Hei tauira, mēnā he pānuitanga pōti te whārangi Facebook o tētahi ropū, kāhore rānei, ka titiro te Kaitiaki Take Kōwhiri ki te whārangi Facebook katoa, tae ki te ihirangi nā te rōpū i whakaputa, pērā i ngā tare o te rōpū me ngā whakaahua kōtaha. Ko te tikanga, ina tare tākupu te tangata takitahi ki te whārangi Facebook o tētahi rōpū, ka pā pea ki aua tarenga te whakawāteatanga mō ngā whakaaro tōrangapū whaiaro.

Mēnā he pānuitanga pōti te paetukukutuku, whārangi tukutuku rānei, kāore e hiahiatia he tauākī kaiwhakatairanga ki ia pikitia, tuhinga, tare rānei i te pae, ina kei te whārangi kāinga te tauākī kaiwhakatairanga, kei te whārangi o te pānuitanga pōti rānei.

I Facebook, Twitter, Instagram me YouTube e tohutohu ana mātou kia kōkuhu e koe he tauākī kaiwhakatairanga ki ‘Mō’, ki te wāhanga kōtaha rānei o tō pūkete, hongere rānei.

Ina utua e koe he pānuitanga pōti kia puta koretono noa ki te whārangi tukutuku a tētahi tangata, hei tauira, he tarenga whakatairanga, he kara pānuitanga rānei ki Facebook, Twitter rānei, me kōkuhu ki te pānuitanga ake he tauākī kaiwhakatairanga. Kaua e whakawhirinaki ki te hono ki te whārangi kei reira te tauākī kaiwhakatairanga.

Ina he ruarua ngā pika, ngā pūāhua rānei hei whakauru ki te tauākī kaiwhakatairanga i te pānuitanga, he pai noa iho te whakapoto i te tauākī kaiwhakatairanga, hei tauira, me whakapoto te ‘He mea whakatairanga nā Anthony Secretary, 111 Any Street, Auckland’ ki ‘A Secretary, 111 Any St, AKLD’.

Ngā tohutoro ki ngā paetukutuku

Ina whai tohutoro paetukutuku tētahi pānuitanga, hei runga anō i te whakamahi i te paetukutuku i roto i te pānuitanga, ka whakaarohia pea te ihirangi o te paetukutuku hei whakatau mēnā he pānuitanga kaitono te pānuitanga, he pānuitanga rōpū, ngā mea e rua rānei, mō ngā kaupapa o te Ture Pōti.

Hei tauira, ina kōkuhuna te tauākī: ‘Haere ki www. standupforanimals.com mō ētahi mōhiohio anō’ ki tētahi tānga pānuitanga, ka whakaarohia te ihirangi o te tānga pānuitanga hui tahi ki te ihirangi o te paetukutuku.

He pai noa iho te whakarārangi paetukutuku, engari ina whakamahia e koe ngā kupu, ngā pikitia rānei e akiaki i ngā kaipānui ki haere ki tētahi paetukutuku, ka whakaarohia tahitia te ihirangi o te pānuitanga me te paetukutuku.

He pānuitanga ‘e pā ana ki te pōtitanga’

Ahakoa kāore e uru he pānuitanga ki te tikanga o te ‘pānuitanga pōti’, me whai tauākī kaiwhakatairanga ia mehemea he ‘pānui e pā ana ki te pōtitanga’ ka tāia ki te nūpepa, hautaka, pānui rahi, mātārere, pāhotanga reo irirangi, pouaka whakaata rānei. [Tirohia te wāhanga 221A o te Ture Pōti]

Hei tauira, ko te pānui rahi e whakatairangatia e tētahi rōpū kē, e whakatītina i te iwi whānui kia pōti, kia kaua rānei e pōti i te pōtitanga, e akiaki rānei kia rēhita te iwi kia āhei ki te pōti i te pōtitanga, kāore e tutuki i a ia te tikanga o te pānuitanga pōti nā te korenga o te kupu hāngai, o te kupu korehāngai rānei mō tētahi kaitono, rōpū, momo kaitono, momo rōpū rānei. Heoi, me mau tauākī kaiwhakatairanga te pānuitanga kia tautuku ki te wāhanga 221A o te Ture Pōti, nō tōna ‘pānga pōtitanga’.

Ngā tohu pōtitanga

Kei ngā kaunihera ā-rohe te mana hei whakarite ko āhea, ko hea, me pēhea hoki e whakaaturia ngā tohu pōtitanga. Me kōrero koe ki ngā mana ā-rohe mō ngā ture e pā ana ki te whakatū tohu pōtitanga.

Nō ka rerekē ngā ture o ia mana kāinga, ka whakaaetia e te Ture Pōti ngā tohu tae ki te 3 mita pūrua te rahi me whakatū mai i te Rāhoroi 22 Hōngongoi mō te pōtitanga whānui. Ka takahia e tēnei whakaritenga ngā whakaritenga whāiti ake o ngā mana ā-rohe mō te rahi o ngā tohu, me te wā whakatū, heoi ehara i te mea e āhei ana koe te whakatū ō tohu ki te wāhi e pai ai koe mai i te Rāhoroi 22 Hōngongoi. Ka pā tonu ngā ture o te mana ā-rohe mō te wāhi, te nunui o ngā tohu, me ngā tukanga tono e pā ana ki te whakatūnga tohu. Tērā e whakaae pea ētahi mana ā-rohe kia whakatūria ngā tohu rahi ake, kia whakatūria hoki i mua i te 22 Hōngongoi.

Ko ngā pātai me ngā amuamu mō ngā tohu kua whakatū me tuku ki te mana ā-rohe whai pānga.

Kaua rawa koe e utu tētahi kaipōti ki te whakaatu i tētahi tohu pōtitanga engari ia ko tāna mahi tērā.

He toihara i raro i te Ture Pōti te whakaatu i ngā tohu pōtitanga i te rā pōti.

Te whakamahi akomanga kura mō ngā hui pōtitanga

E āhei ana ngā kaitono rohe pōti me ngā kaitono rārangi ki te whakahaere i ā rātou hui pōtitanga i ngā akomanga kura mō te kore utu (hāunga ngā utu mō te hiko, te whakapai me te whakatika tukinga). Me whakamōhio atu ki te rōpū whakahaere o te kura kia toru ngā rā i mua o te hui. Me whakaae ngā tono i runga i te tikanga “ko te mea tōmua te mea ka waimarie”.

Te whakapati

Ko te ‘whakapati’ ko te whakarato i te kai, te unu, te whakangahau, tētahi atu whakaratonga rānei hei whakaawe hē tonu i tana pōti, otiia he toihara tēnei ki te ture. [Tirohia te wāhanga 217 o te Ture Pōti mō te whakaahuatanga katoa]

Ka kōrerotia whānuitia te wāhanga 217 ko te wā e pā ai ia: ka taupoki i ngā mahi “o mua, o waenganui, o muri rānei i te pōtitanga”.

He nui tonu ngā whiu o te whakahara mō te whakapati, tae ki te mauherehere, te ngaro o te tūru Pāremata, te whakatupe rānei i te mana kaipōti mō te toru tau.

Ahakoa he whānui te hōrapa, he teitei hoki te pae e whakaūkia ai he whakapati – me whakaū he koronga hē. Ko tā ngā Kōti i mua mō te toihara “whakapati” ka hiahiatia he koronga nā te kaiwhakapati ki te whakaawe i ngā pōti o te hunga i whakapatipati.

E ai ki te Ture Pōti ehara te whāngai hapa iti i muri i tētahi hui pōti i te mahi toihara whakapati. Ko te hora kapu tī, kawhe rānei me ētahi kai paramanawa i muri i tētahi hui whakahau, ehara i te whakapati.

Torutoru rawa ngā take Kōti mō tēnei toihara, nō reira he uaua te whakamārama pū he aha oti tēnei mea te whakapati. Heoi anō, ki te whakaaro o te Kaitiaki Take Kōwhiri, anei ētahi āhuatanga e mea ana mātou me āta whakaaro:

  • te nui me te uara tauhokohoko o te kai, te unu, te whakangahau, tētahi atu whakaratonga rānei. Ki tā mātou titiro he take nui tēnei, ka hiahiatia mō te whakapati he koronga hē me te tūpono o te awe – kāore tēnei e pā ki te manaaki ka puta noa i tētahi hui tōrangapū
  • te hunga apataki māna te whakaratonga – ko te hora i te kai, te unu, te whakarato i te whakangahau hoki i tētahi hui ā-tau, uakinga whakahau, rūnanga rōpū tōrangapū ā-tau rānei – he mema rōpū nei te nuinga o te apataki – ehara noa iho pea i te whakapati, heoi he nui kē te mōrearea o te hora kai, unu, whakangahau anō, i tētahi hui ā-iwi, otirā
  • te nui o te rauemi tōrangapū ka whakarato tahi me ērā atu whakaratonga.

Ki te whakaaro o te Kaitiaki Take Kōwhiri, kia āraia te amuamu he whakaaro nui te mahi tūpato mō ngā rōpū me ngā kaitono me ō rātou kaitautoko, te āta haere hoki ina whakarato i te kai me te unu – inā rā te waipiro – me te whakangahau hei wāhi o ā rātou mahi tōrangapū.

Ina māharahara koe mēnā he whakapati te mea e whakatakoto ana koe, me rapu e koe te whakaaro o te Kaitiaki Take Kōwhiri.

Kāhore he herenga ā-ture o te whakaaro o te Kaitiaki Take Kōwhiri. Ka tae pea he kōti o te ture ki tētahi whakaaro kē, nā reira ka hiahia pea koe kia kimi i tōu ake tohutohu ā-ture.

Te whakahau tata ki ngā wāhi pōti tōmua

Kāore e pā ki te wā pōti tōmua ngā rāhuitanga e ārai ana i ngā mahi whakahau pōti i te rā pōti. Heoi anō, tērā ngā rāhuitanga ki te whakahau i roto rawa, i roto i te 10 mita rānei o te tomokanga ki te wāhi pōti tōmua (“te wāhi ārai”).

Kua hora ki te wāhanga 197A o te Ture Pōti he rārangi o ngā mahi katoa kua ārai, e ārai rawa i ngā mahi e kīia ai kei te whakararuraru, kei te whakaawe rānei i ngā kaipōti, tae ki ngā tira haere, ngā whaikōrero, me ngā kōrero tūmatanui i te wāhi ārai.

Ko ngā tohu, ngā kākahu me ērā atu rauemi whakahau e whakaatu ana te ingoa rōpū, ingoa kaitono rānei, ngā tohu, pepeha, moko rānei, me kaua e whakaatu, e tohatoha rānei i roto i te wāhi pōti tōmua, i te wāhi ārai rānei.

Kua whakamana ngā Āpiha Whakahoki Pōti kia tango, kia taupoki rānei i ngā pānuitanga e takahi ana i ēnei ture, kia namaia hoki ngā utu ki te hunga i whakaatu.

Ka āhei koe, ō kaitautoko, me ngā kaitirotiro te whakamau i tētahi tohu rōpū whētui. Ko te tohu whētui he tohu, he tohu ā-ripene rānei hei mau ki te whētui kei roto anō te ingoa, te tohu, te pepeha, te moko rānei o te rōpū. Kaua tō ingoa e whakaatu i runga i te tohu whētui.

Ka taea ngā rīpene roa, ngā tohu rōhi (i tua atu i ērā ka whakamaua ki te whētui), ngā rīpene me ngā mea pērā ki ngā tae o te rōpū, te whakaatu i te wāhi ārai, engari ki runga tangata, waka anake rānei, ā, kaua ngā ingoa, ngā tohu, ngā pepeha, ngā waitohu rānei o te rōpū tōrangapū, tōu ingoa ake rānei.

Rite ana ngā ture mō te whitiāhua me te tango whakaahua i te wāhi pōti tōmua ki ērā mō te rā pōti, tirohia te Wāhi 4.

Ngā amuamu mō te pānuitanga pōti

Ka utaina ētahi whakaritenga tukanga, whakaritenga wā hoki ki ngā kaiwhakaputa me te hunga pāpāho e ngā ture i te Ture Pōti me te Ture Pāho. Hei tauira te rāhuitanga ki ngā hōtaka pāpāho pōtitanga o waho o te wā pōti, me te whakaritenga kia whai tauākī kaiwhakatairanga ngā pānuitanga pōti katoa.

Kāore te whakaturetanga e kōrero mō te ihirangi hōhonu o ngā pānuitanga pōti me ngā hōtaka pōti, heoi me ū ngā kaiwhakaputa me te hunga pāpāho ki ngā ture pāho whai pānga, ngā ture whanonga rānei.

Te Kaitiaki Take Kōwhiri

Kei te Kaitiaki Take Kōwhiri te kawenga kia tirohia ngā amuamu mō te takahitanga o ngā ture pānuitanga pōti me ngā ture o te rā pōti i raro i te Ture Pōti, me ngā hōtaka pōti i raro i te Wāhanga 6 o te Ture Pāho.

Kāhore he tūranga hāmene, tūranga uruhi rānei o te Kaitiaki Take Kōwhiri. Ki te whakapono te Kaitiaki Take Kōwhiri kua hara tētahi me pūrongo e ia ngā meka ki ngā Pirihimana o Aotearoa. Mō ētahi hara ruarua o te Ture Pōti kāore he tikanga kia pūrongo hara te Kaitiaki Take Kōwhiri inā he iti rawa te hara kāore e aro atu te iwi whānui ki te pūrongotanga o aua meka ki ngā Pirihimana o Aotearoa.

Ka taea te amuamu ā-tuhi ki enquiries@elections.govt.nz mā te poutāpeta rānei ki te Kaitiaki Take Kōwhiri i PO Box 3220, Wellington.

Mana Whanonga Kaipāho

Ka taka ngā hōtaka pōtitanga i te pouaka whakaata me te reo irirangi (tae ki ngā pānuitanga rōpū, kaitono hoki) ki raro i te mana o te Mana Whanonga Kaipāho (BSA). Me ū ngā hōtaka pōtitanga ki te Ture Hōtaka Pōtitanga (Election Programme Code) e wātea ana i te paetukutuku a te BSA.

Me ū ngā hōtaka a rōpū kē mō ngā take pōti ki ngā paetae pāho whai pānga mō te reo irirangi, Pouaka Whakaata Koreutu, Pouaka Whakaata Utu rānei.

Ko ngā amuamu mō tētahi hōtaka pōtitanga i raro i te Ture Hōtaka Pōtitanga, me tuku tika tonu ki te BSA:

Mana Whanonga Kaipāho
PO Box 9213, Te Whanganui-a-Tara 6141
Level 2, 119 Ghuznee Street,
Te Whanganui-a-Tara 6011
Waea: 04 382 9508
Waea whakaahua: 04 382 9543
Īmēra: info@bsa.govt.nz
Paetukutuku: www.bsa.govt.nz

Ko ngā amuamu mō te pāhotanga e pā ana ki te pōtitanga a te hunga pāpāho me ngā rōpū kē i raro i ngā ture pāho, me mātua tuku ki te kaipāpāho. Ki te kore te kaiamuamu e pai ki te otinga o tāna amuamu ki te kaipāpāho, e āhei ana ia te tuku tāna amuamu ki te BSA kia tirohia anō.

Mō ngā tohutohu mō ngā ture whanonga, mō te tukanga amuamu rānei me whakapā atu ki te BSA (waea 0800 366 996, īmēra rānei info@bsa.govt.nz).

Mana Whanonga Pānuitanga

Ko te ihirangi pānuitanga pōti o ngā momo pāho katoa i tua atu i ngā hōtaka pōtitanga i te pouaka whakaata me te reo irirangi, ka taka ki raro i te mana o te Mana Whanonga Pānuitanga (ASA).

Me ū ngā pānuitanga ki ngā Tikanga Mahi a te ASA.

Kei te paetukutuku a te ASA aua Tikanga. Tirohia hoki ngā Mātāpono Tohutohu Tautoko Pānuitanga.

Me amuamu tika tonu ki:
Mana Whanonga Pānuitanga
PO Box 10 675, Te Whanganui-a-Tara 6143
Ground Floor, 79 Boulcott Street, Te Whanganui-a-Tara
Waea: 04 472 7852
0800 ADHELP (0800 234357) rānei
Īmēra: asa@asa.co.nz
Paetukutuku: www.asa.co.nz

Kaunihera Nūpepa

Kei te Kaunihera Nūpepa o Aotearoa te kawenga tirotiro mō ngā amuamu e pā ana ki te ihirangi ētita o tētahi nūpepa, mōheni, hautaka rānei e whakaputaina ki Aotearoa (tae ki ngā paetukutuku) ngā pae mamati rānei, e whai ihirangi rongo kōrero, kua whakaaetia hei mema o te Kaunihera.

Ko te tikanga, ko te tangata e amuamu ana ki tētahi whakaputanga me mātua tuku tāna amuamu ki te ētita o taua whakaputanga, engari ia kua whakawāteatia e te Kaihautū o te Kaunihera.

Ki te kore e pai te kaiamuamu ki te urupare a te ētita, ki te kore e whiwhi urupare rānei i te ētita i roto i ngā rā mahi 10 o te rā i whiwhia te amuamu e te ētita, ka āhei te kaiamuamu ki te amuamu ki te Kaunihera Nūpepa (tuihono i www.presscouncil.org.nz tērā rānei PO Box 10 879, The Terrace, Te Whanganui-a-Tara, 6143).

Me tuhi ngā amuamu, pai kē mā te puka tuihono. Ka wātea he mōhiohio mō te tukanga amuamu, ngā tepe wā hei tuku amuamu, me te rārangi o ngā mema o te Kaunihera Nūpepa i www.presscouncil.org.nz.

Promote to MegaMenu: 

Wāhanga 3: Ngā whakapaunga pōti me ngā takoha

Mā ngā kaitono e whakahaere ā rātou herenga e pā ana ki te pōtitanga, tae ki te tuhinga pūkete me te whakatakoto pūrongo mō ngā whakapaunga me ngā takoha i muri i te pōtitanga. Ka whakamārama tēnei wāhanga i te pūtea e āhei te kaitono te whakapau ki tōna pānuitanga whakahau, ngā momo takoha e tika kia whiwhi, me te pūrongo mō ngā whakapaunga me ngā takoha.

Ngā kōrero matua

Ka taea e koe te tīmata ki te whakahau me te kohi moni mō te pōtitanga whānui ina pai koe.
Ka pā ngā tepe whakapaunga ki te pānuitanga ka whakaputaina i te wā whakarite (23 Pipiri ki te 22 Mahuru).
Kāhore he tepe whānui ki te nuinga e āhei ana koe te whiwhi hei takoha.
Hei mua o te 23 Kohitātea 2018 kōnaetia ai ngā takoha kaitono me ngā pūrongo whakahoki whakapaunga mō te pōtitanga whānui 2017.
Me whakatakoto pūrongo mō ngā whakapaunga pōti me ngā takoha ngā kaitono katoa, ahakoa i whiwhi, i whakapau moni rānei, kāhore rānei.

Ngā whakapaunga pōti

Tepe whakapaunga

Kia kaua rawa ō whakapaunga pōti mō te wā whakarite (23 Pipiri ki te 22 Mahuru) e hipa atu i te $26,200 (kei roto te GST). He toihara te whakapau nui atu i tēnei.

Ki te tū koe mō tētahi rōpū kua rēhita, me kōrero tonu koe ki te hēkeretari o tō rōpū mō ngā pānuitanga. Me pēnei nō te mea ka pā pea te ihirangi pānuitanga ki te pānuitanga kaitono me te pānuitanga rōpū, me ngā pānga i muri ake ki ngā tepe whakapaunga me ngā pūrongo whakapaunga o te kaitono me te rōpū.

Ngā whakapaunga pōti

Ko ngā whakapaunga pōti ko ngā utu mō ngā pānuitanga o tētahi momo pāho e:

  • whakaarohia rawatia hei whakatītina i ngā kaipōti ki te pōti mō te kaitono, te whakapāhunu rānei i ngā kaipōti kia kaua e pōti mō tētahi atu kaitono, ēnei mea e rua rānei (ahakoa whakaingoatia te/ngā kaitono, kāore rānei),
  • whakaputaina, e whakaputaina tonutia rānei i te wā whakarite, ā,
  • whakatairangatia e te kaitono, tētahi atu tangata rānei (tae atu ki tētahi kaiwhakatairanga kua rēhita) e whakamana e te kaitono. [Tirohia te wāhanga 205 o te Ture Pōti]

Kei roto i ngā whakapaunga pōti a ngā kaitono:

  • ngā utu mō te whakarite, te hoahoa, te waihanga, te tā, te mēra atu me te whakaputa i te pānuitanga
  • te uara mākete tōkeke o ngā rawa ka whakamahia mō te pānuitanga, tae atu ki ngā rawa ka hoatu noa ki te kaitono mō te kore utu, mō raro rānei o te utu mākete
  • ngā utu wehewehe mō ngā pānuitanga e whakatairanga i ngā kaitono tokorua neke atu, te rōpū me tētahi kaitono rānei. [Tirohia te wāhanga 3E o te Ture Pōti]

Ehara ēnei i te whakapaunga pōti, tō tāpui kōharinga, ngā utu mō ngā kai rānei, te rīhi hōro, ngā rangahau, te tatau whakaaro rānei, ngā mahi tūao, te whakakapi rānei i ngā rauemi i tukitukia engari ehara nōu te hē. Ehara te hanganga whakatū tohu pōti (i tua atu i te hanganga tauhokohoko) i te whakapaunga pōti.

Ngā rangahau me ngā tatau whakaaro

Ehara i te mea mutunga kore te whakawāteatanga o ngā rangahau, ngā tatau whakaaro rānei. Ki te hipa atu tētahi rangahau i te rapu i ngā whakaaro o ngā kaipōti, ā, ka kitea he whakatītina kē i ngā kaipōti ki te pōti mō tētahi kaitono rohe pōti, tētahi rōpū tōrangapū rānei, ka whakaritea ehara i te rangahau, tatau whakaaro rānei e ai ki te Ture. Ka noho hei pānuitanga pōti, ā, he whakapaunga pōti ngā utu whai pānga ki te rangahau. Mēnā he pānuitanga kaitono e whakahaeretia e ngā kaiuiui ā-waea e mahi ana mō te kore utu, ka whakawāteatia ngā utu. Ko ētahi atu utu (hei tauira, ngā rīhi waea me ngā utu mō ia kōrero ā-waea) he whakapaunga ēnei. He whakapaunga pōti te utu i tētahi umanga rapu whakaaro ki te whakahaere rapunga whakaaro.

Ngā tohu motokā

He whakapaunga pōti ngā utu o te pānuitanga tohu kaitono i runga i ngā waka whakahau me ētahi atu momo pānuitanga nekeneke a te kaitono. Engari, kāore e uru ngā utu whakahaere i te waka whakaatu pānuitanga pōti mēnā kāore e whakamahi ana taua waka hei kawe pānuitanga i raro i tētahi kirimana, whakaritenga, whakaaetanga utu rānei.

Ngā paetukutuku

Ko ngā whakapaunga pōti e pā ana ki ngā pānuitanga kaitono e whakaputaina ki tētahi paetukutuku ko ngā utu mō te whakarite, te hoahoa me te whakaputa i te pānuitanga, tae atu ki ngā utu taurima. Kāore i roto ngā utu mō te whakatū me te whakahaere i ngā hanganga pūmāro, pūmanawa hoki o te paetukutuku.

Ngā rawa i tohatoha hei whakaatu tūmatanui

Ki te tohatoha rawa koe pēnei i ngā tī hāte, ngā whakapiri āraituki me ngā haki i mua i te tīmatanga o te wā whakarite, me whakaaro koe ka whakaatu tonutia aua mea i te wā whakarite anō, ka whakauru ai i ngā utu mō ēnei rawa hei whakapaunga pōti. [Tirohia te wāhanga 205D o te Ture Pōti]

Kia tūpato ki ēnei rawa kei whakaraerae i a koe ō kaitautoko ki te hāmene ina whakaatu rātou i aua rawa i te rā pōti.

Ngā rawa ka whakamahia anō i waenga pōtitanga

Kāore e taea ngā whakapaunga te wehewehe i waenga pōtitanga. Ki te hoko rawa koe pēnei i ngā kara, ka whakamahia anō ēnei i ngā pōtitanga i muri ake, i ia pōtitanga i muri ake me kaute e koe hei whakapaunga pōti te uara mākete tōkeke o aua rawa.

E mea ana mātou kia whakamahi e koe te utu tuatahi i utua mō te rawa, ā, ki te kore tēnei e mōhiotia, te utu e utua ināianei mō taua rawa i runga i ngā whakatau utu e rua.

Ngā hāora a ngā kaimahi

Ehara te uara o te mahi ka whakaratoa ki a koe mō te kore utu i te whakapaunga pōti. Ko ngā utu a ngā kaimahi whakahau e utua ana, hei tauira, tētahi kaiwhakahaere whakahau, ehara i te whakapaunga pōti engari rawa mēnā kei roto anō taua kaimahi i ngā mahi whakariterite, hoahoa, waihanga, tā, tuku mēra, whakaputa rānei o ngā pānuitanga pōti. Ko tētahi tauira e pā ai te utunga kaimahi hei whakapaunga pōti ko te whai wāhi pū o te kaimahi ki te whakaritenga tārua, ngā mahi toi rānei.

Ngā whakapaunga pōti i utua i mua, i muri rānei i te wā whakarite

Ko ngā whakapaunga ka utua, ka riro mai rānei i mua i te wā whakarite (23 Pipiri ki te 22 Mahuru), i muri rānei i te rā pōti (23 Mahuru), me whakauru rawa ki te pūrongo whakapaunga i runga anō i te pānga o aua utu ki ngā pānuitanga pōti i whakaputaina i te wā whakarite.

Te wehewehe whakapaunga pōti

Ina whakaputaina he pānuitanga kaitono i mua, i roto rānei i te wā whakarite, nōu te kawenga kia wehewehea ngā whakapaunga pānuitanga kia tāpaea ki te wā whakarite he wāhi tōkeke noa o te whakapaunga.
Ka hiahiatia hoki kia wehewehe e koe ngā whakapaunga pōti ina pau he wāhi o te tapeke o tētahi pānuitanga pōti mō te whakatairanga i a koe hei kaitono, he wāhi anō mō:

  • te rōpū
  • tētahi, ētahi atu kaitono hoki/rānei.

Ko ngā kaitono e tiritiri ana i ngā utu pānuitanga ki tētahi rōpū e rapu ana i ngā pōti rōpū, me kōrero ki te hēkeretari o taua rōpū mō ngā whakaritenga wehewehe.

He mahi pono te wehewehe, he mea whakarite i runga anō i ngā āhuatanga o tēnā o tēnā. E pai ana mātou ki te matapaki i ngā pātai wehewehe.

Ngā whakapaunga pōti mō ngā pānuitanga nā rōpū kē

Kāore e taea ngā whakapaunga te wehewehe ki ngā kaiwhakatairanga o rōpū kē. Ki te whakamana e koe tētahi atu ki te whakaputa pānuitanga e whakatītina tangata ana ki te pōti mōu, ka uru te utu o aua pānuitanga ki ō whakapaunga pōti kaitono. Ka uru anō ēnei utu hei whakapaunga pōti o taua rōpū.

Me tiki koe i ngā mōhiohio mai i taua rōpū mō ngā utu ka riro. Kua whakatakoto ngā ture mō te pānuitanga me te whakapaunga e pā ana ki rōpū kē ki te pukapuka iti Third Party Handbook – General Elections 2017.

Te utu whakapaunga pōti

Me tuku ngā nama whakapaunga pōti ki a koe i roto i ngā rā mahi 20 o te whakapuakanga o ngā otinga whaimana (hei te 6 Whiringa-ā-rangi).
Me utu e koe tētahi nama i roto i te 40 rā mahi o te whakapuakanga o ngā otinga whaimana (4 Hakihea). He toihara ki te kore e tutuki tēnei. E rārangi ana i ngā wāhanga 205H me te 205I o te Ture Pōtitanga te tukanga hei whai ina tohea he nama.

Ngā takoha

Ngā takoha kaitono

Ko te takoha kaitono ko te takoha moni, rawa, ratonga rānei ka hoatu mō te whakahau a te kaitono. [Tirohia te wāhanga 207 o te Ture Pōti]

Ko ngā takoha kaitono, me ngā tukutanga ki ngā takoha, nui ake i te $1,500 (kei roto te tāke hokohoko) me whakapuaki ki tō pūrongo mō ngā whakapaunga me ngā takoha. Me whakapuaki he rangatū takoha, ngā tukutanga ki ngā takoha rānei nā te tangata kotahi ina nui ake te tapeke i te $1,500.

Kei roto i tētahi takoha kaitono:

  • ina tukuna ētahi rawa, ratonga rānei ki te kaitono mō te kore utu, ā, e neke atu tōna wāriu mākete tōkeke i te $300
  • ina tukuna ētahi rawa, ratonga rānei ki te kaitono mō te utu kua whakaiti, ā, e neke atu te wāriu mākete tōkeke o ngā rawa, ratonga rānei i te $300, he takoha te rerekētanga i waenga i te utu kirimana, utu whakaaetia rānei me te wāriu mākete tōkeke o aua rawa me ngā ratonga
  • ina hokona atu e tētahi kaitono he rawa, ratonga rānei e nui atu ki tōna ake wāriu, he takoha te rerekētanga i waenga i te utu i utua me tōna wāriu mākete tōkeke, hei tauira, tētahi mākete kohi moni, hākari kohi moni rānei
  • ina tukua tētahi kaitono kia noho nama mō ngā āhuatanga pai ake ki ērā atu āhuatanga o te wā, he takoha te wāriu o aua āhuatanga pai ake.

Ehara ēnei i te takoha kaitono:

  • mahi tūao
  • ngā rawa, ratonga rānei e tukua mō te kore utu ki tētahi kaitono, ki tētahi tangata rānei mō te kaitono, e rite ana tōna wāriu mākete tōkeke ki te $300, iti iho rānei,
  • ngā moni rānei ka tukua e te kaitono mō tāna ake whakahau.

Ina tuku, ina utu rānei he tangata, he umanga rānei mō ētahi rawa, ratonga rānei ka whakaarohia noatia hei whakapaunga pōti , ina tuku, ina utu rānei tō rōpū mō ētahi rawa utu nui, me tuhi hei whakapaunga pōti te wāriu mākete tōkeke o aua taonga, ahakoa he aha te wāriu. Mēnā ka nui ake te wāriu mākete tōkeke o aua taonga i te $300, me tuhi hei takoha.

Ngā takoha rōpū

Ko te takoha rōpū ko te takoha moni, rawa, ratonga rānei ki tētahi rōpū. I ētahi wā ka hoatu he takoha rōpū rā te kaitono, rā te komiti rohe pōti rānei.

Ki te kore e kī te kaitakoha mehemea he takoha tēnei ki te rōpū, ki te kaitono rānei, ka whakaarohia ia hei takoha ki te rōpū.

Ki te whiwhi takoha koe mō te rōpū, me whakawhiti ki te hēkeretari o te rōpū i roto i te 10 rā mahi o te whiwhinga, me whakatakoto rānei ki te pūkete pēke e whiriwhiri te hēkeretari.

Me puaki hoki koe ki te hēkeretari o te rōpū:

  • e whakawhitihia ana te takoha mō tētahi kaitakoha
  • te ingoa me te wāhi noho o te kaitakoha
  • mehemea nō ngā tukunga moni te takoha
  • mō ngā moni tuku nā te kaitakoha kotahi he nui ake i te $1500 ahakoa kotahi, ahakoa huia rānei ki ētahi atu moni tuku o taua kaitakoha, te ingoa me te wāhi noho o te kaitakoha, te nuinga o te moni tuku (te tapeke rānei o ngā moni tuku ina whakakotahi), mēnā hoki ‘nō tāwāhi’ taua kaitakoha, otirā
  • te tapeke katoa o ētahi atu moni tuku.

Ki te kore e mōhiotia te ingoa me te wāhinoho o te kaitakoha, me whakahaere te takoha hei takoha kore ingoa ki te rōpū.

Ngā takoha nō ngā moni tuku

Ka taea ngā takoha te whakatōpū mai i ngā wāhi o ngā tāngata tokomaha (ngā kaituku moni), hei tauira ina kohia, ina tukua rānei he moni mō te whakahau a tētahi kaitono. [Tirohia te wāhanga 207 o te Ture Pōti]

Ko ngā hua katoa o tētahi kohinga moni me whakahaere hei takoha i raro i te Ture Pōti. Ko te tangata nāna i kohi te moni, ko te tikanga ko ia te kaitakoha. Ko ngā tāngata ka tuku moni ki te kohinga pūtea ka kīia he kaituku moni i raro i te Ture Pōti.

Mehemea nō ngā moni tuku te takoha kaitono, i tua atu i te takoha ingoa kore, me kōrero te kaiwhakawhiti, te kaitakoha rānei ki te kaitono:

  • te ingoa me te wāhi noho o te kaitakoha
  • nō ngā moni tuku te takoha
  • mō ngā moni tuku nā te kaitakoha kotahi he nui ake i te $1500 ahakoa kotahi, ahakoa huia rānei ki ētahi atu moni tuku o taua kaitakoha, te ingoa me te wāhi noho o te kaitakoha, te nuinga o te moni tuku (te tapeke rānei o ngā moni tuku ina whakakotahi), mēnā hoki ‘nō tāwāhi’ taua kaitakoha, otirā
  • te tapeke katoa o ētahi atu moni tuku.

Ki te mōhio koe, ki te whai take rānei kia whakapono kāore te kaitakoha i homai ngā mōhiohio tika mō ngā moni tuku, me whakahoki te takoha katoa ki te kaitakoha.

He tauira:
Ki te tuhi e tangata A kia whā ngā haki $500 ki te komiti whakahau o te kaitono, ka takoha ai e B, e C, e D hoki he $100, ā, ka takoha te komiti ki te kaitono, me whāki te kaiwhakahaere o te komiti whakahau ki te kaitono i ahu mai ai te takoha $2,300 i ngā tukunga moni kei roto anō he takoha $2,000 nō tangata A, me te ingoa me te wāhi noho o tangata A, otirā, e $300 te tapeke nō ētahi atu kaituku < $1,500.
He tauira:
Ina whakahaere te komiti rohe pōti i ngā hui kohi moni e rima i ngā rā i mua o te pōtitanga, ā ka hoatu ki te kaitono e rima ngā haki mō te $1,000 i roto i te ono marama, he takoha whakakotahi tēnei o te $5,000. Ehara ēnei i te moni tuku. Me whakauru tēnei tapeke ki te pūrongo takoha o te kaitono.

Ngā rāwhara, tēpu hoko me ētahi atu momo kohi moni

Ko ngā kaitautoko e hoatu koreutu ai i ngā keke, i ētahi atu rawa, ratonga rānei ki a koe hei kohi moni, kāore i te tuku takoha i raro i te Ture Pōti mehemea he iti ake i te $300 te wāriu o te mea hoatu. Ehara ngā kaihoko tīkiti rāwhara, keke ranei i te ‘kaitakoha’, inā kāore rātou i te takoha ki tētahi tangata. Ko ngā moni katoa o tētahi rāwhara, tēpu hoko keke rānei mō tō whakahau ka whakahaeretia hei takoha. Ko te tikanga ko te tangata whakahaere i te rāwhara, i te tēpu hoko keke rānei, ko ia te kaitakoha.

Ina nui atu i te $1,500 ngā moni katoa o te rāwhara, te tēpu hoko keke rānei, me uru ki tō pūrongo te ingoa me te wāhi noho o te tangata i whakahaere te kohinga moni, i takoha hoki i ngā moni, tae atu ki te tapeke katoa i hoatu, me te rā i whiwhia te takoha.

Mehemea he ‘kaituku moni’ ngā tāngata e hoko tīkiti, keke rānei, kei runga tērā i tāna hoko i te tīkiti, keke rānei me te mōhio, me te tūmanako rānei ka haere ētahi, te katoa rānei o te moni i utu hei takoha ki te kaitono. Ka ai tēnei hei pātai meka. Me tino mārama ngā kaihoko he mahi kohi moni mā tētahi kaitono tēnei kia whakaritea ngā kaihoko tīkiti hei ‘kaituku moni’.

Mēnā he ‘kaituku moni’ ngā kaihoko tīkiti rāwhara, me kōrero te kaiwhakahaere ki te kaitono i te wā e hoatu ai te takoha he takoha tēnei nō ngā moni tuku. Me puaki anō te kaitakoha mēnā nō ngā moni tuku nui atu i te $1,500 te takoha. Ina utu tētahi tangata neke atu i te $1,500 mō ngā tīkiti rāwhara, me puaki tōna ingoa me tōna wāhi noho i tō pūrongo takoha, me te tapeke o tāna moni tuku.

Ki te hokona he tīkiti ki tētahi hui kohi moni, pēnei i te hākari, ka hokona atu rānei he taonga i tētahi mākete kohi moni, he takoha te rerekētanga i waenganui o te utu i utua mō te tīkiti, te taonga rānei, me te wāriu mākete tōkeke o te tīkiti, te taonga rānei. He uaua pea te whakarite i te uara mākete tōkeke o ngā taonga ahurei. Hei tauira, ina kei tō hākari ētahi kaikōrero, ina hokona atu rānei he taonga ahurei. Engari, kaua koe e whakawhirinaki ki te utu i utua i te mākete mahi moni hei taunaki o te wāriu mākete tōkeke.

Ki te kāhore he tikanga tōkeke e tautīnei e koe te wāriu o te wāhanga takoha, ko te tohutohu a te Kaitiaki Take Kōwhiri me hē koe ki te taha tūpato, ā, me whakahaere hei takoha te rerekētanga katoa i waenganui o te utu tīkiti, te utu hoko rānei, me te wāriu mākete tōkeke o ngā rawa, ratonga rānei ka taea te tatau, pēnei i te kai me te inu.

He tauira:
Ki te tono a tangata A, ka wini i ngā mea e rua i tētahi mākete kaitono mahi moni, ā ka utu he $1,500 mō ia mea (arā, e $3,000 te tapeke), ā, ko te wāriu mākete tōkeke o ia mea ko te $500 (arā, e $1,000 te tapeke) – me puaki te kaitakoha nāna i whakahaere te mākete kohi moni, nō te pūtea moni tuku te takoha, me tūtohu hoki nā tangata A i tuku e $2,000 o te takoha, ā me hoatu te ingoa me te wāhi noho o tangata A.

Ngā takoha whakawhiti

Ka taea he takoha te tuku hāngai ki a koe e te kaitakoha, te tuku autaki rānei mā te kaiwhakawhiti e whakawhiti ai i tētahi takoha ki a koe mō tētahi atu, hei tauira mā te pūtea kaitiaki a te rōia.

Ko te tangata e whiwhi ki tētahi takoha kaitono mōu, me whakawhiti e ia ki a koe i roto i te 10 rā mahi.

Ina whakawhitihia he takoha, me kōrero e te kaiwhakawhiti ki a koe:

  • e whakawhitihia ana te takoha mō tētahi kaitakoha
  • te ingoa me te wāhi noho o te kaitakoha
  • mehemea nō ngā tukunga moni te takoha
  • mō ngā moni tuku nā te kaitakoha kotahi he nui ake i te $1500 ahakoa kotahi, ahakoa huia rānei ki ētahi atu moni tuku o taua kaitakoha: te ingoa me te wāhi noho o te kaitakoha, te nuinga o te moni tuku (te tapeke rānei o ngā moni tuku ina whakakotahi), mēnā hoki ‘nō tāwāhi’ taua kaitakoha (titiro ki raro nei), otirā
  • te tapeke katoa o ētahi atu moni tuku.

Ki te kore te kaiwhakawhiti e puaki te ingoa me te wāhi noho o te kaitakoha, me whakahaere taua takoha hei takoha ingoa kore.

Ngā takoha ingoa kore

Kāore ngā kaitono e āhei te pupuri i ngā takoha ingoa kore nui atu i te $1,500. Ko te takoha ingoa kore he takoha i hoatu mā te ara e kore te kaitono e mōhio ki te kaitakoha, ā kāhore tonu, i ngā āhuatanga pēnei, e manakohia kia mōhio ai ia ko wai te kaituku [Tirohia te wāhanga 207 o te Ture Pōti]

Ki te whiwhi koe i tētahi takoha ingoa kore nui atu i te $1,500, ka taea e koe te pupuri i te $1,500 o taua takoha. Me utu te toenga o te takoha i roto i ngā rā mahi 20 o te whiwhinga, ki te Kaitiaki Take Kōwhiri kia utua ki tētahi pūkete pēke o te Karauna.

Hei roto i te takoha nō tētahi rōpū kaitiaki ngā ingoa me ngā wāhi noho o te kaiwhakatatū o te rōpū kaitiaki, o te tangata rānei nāna te takoha i whakarite.

Ngā takoha nō tāwāhi

Kāore e āhei ngā kaitono te pupuri i ngā takoha, moni tuku rānei nui atu i te $1,500 nō tētahi tangata o tāwāhi. [Tirohia te wāhanga 207K o te Ture Pōti].

Ko te tangata nō tāwāhi:

  • ko tētahi tangata e noho ana i waho o Aotearoa ehara i te kirirarau nō Aotearoa, ehara i te kaipōti rēhita rānei
  • he manatōpū i whakatōpū i waho atu o Aotearoa,
  • he rōpū rānei kāore anō kia whakamana, ā, e noho ana tōna tari matua, wāhi pakihi matua rānei i waho atu o Aotearoa.

Ina whiwhi takoha koe i tētahi tangata nō tāwāhi nui atu i te $1,500 (tōna kotahi rānei, ina huia rānei ki ērā atu takoha o taua tangata o tāwāhi), ka taea e koe te pupuri te $1,500 o taua takoha. Me whakahoki te toenga o te takoha ki te tangata o tāwāhi nāna te takoha, i roto i te 20 rā mahi, ki te kore rānei e taea ai tērā, me utu ki te Kaitiaki Take Kōwhiri kia utua ki tētahi pūkete pēke o te Karauna.

Ki te whiwhi takoha koe i tētahi kaituku takoha ehara i te tangata o tāwāhi engari kei roto he takoha nō tētahi tangata o tāwāhi nui atu i te $1,500 (tōna kotahi rānei, ina huia rānei ki ērā atu takoha o te tangata o tāwāhi), me whakahoki e koe te takoha katoa ki te kaitakoha. Ki te kore e taea ai tērā, me utu te takoha katoa ki te Kaitiaki Take Kōwhiri kia utua ki tētahi pūkete pēke o te Karauna.

Te pupuri pūrongo o ngā whakapaunga me ngā takoha

Me āta whakarite koe ki te pupuri pūrongo o ngā takoha kaitono katoa ka whiwhia (tae ki ngā takoha iti ake i te $1,500) me ngā whakapaunga pōti kaitono katoa. Me pupuri e koe ngā nama me ngā rihīti mō ngā whakapaunga pōti katoa o te $50 neke atu mō ngā tau e 3 o muri o te whakatakoto pūrongo. Me whai pūnaha koe hei tatau haere i ngā tapeke whakatōpū nō ngā kaitakoha mō te kaupapa o te whakahoki pūrongo.

Te pūrongo mō ngā whakapaunga pōti me ngā takoha

I muri i te pōtitanga whānui ka hiahiatia kia tuku e koe he pūrongo o ngā whakapaunga me ngā takoha kaitono ki te Kaitiaki Take Kōwhiri. [Tirohia ngā wāhanga 205K me 209 o te Ture Pōti]

Ko te pūrongo me:

  • mahi ki te puka Pūrongo Takoha me ngā Whakapaunga Kaitono Rohe Pōti, ā
  • me tuku te pūrongo i roto i te 70 rā mahi o te rā pōti (i mua i te 23 Kohitātea 2018).

Kei te wātea te puka rā te Kaitiaki Take Kōwhiri, rā tō hēkeretari rōpū rānei, ā, kei roto anō ngā taipitopito tohutohu me pēhea te whakaoti i te puka, te pūrongo hoki.

E tūtohutia ana kia āta kōrero ngā kaitono a ngā rōpū rēhita ki tō rātou hēkeretari o te rōpū mō ā rātou pūrongo whakapaunga. Me pēnei kei ara mai ētahi raruraru wehewehenga i waenganui i te pūrongo whakapaunga o te kaitono me te pūrongo whakapaunga o te rōpū.

Ina kāhore he whakapaunga pōti, he takoha rānei hei pūrongo, me tuku e koe he pūrongo korekore.

Ka noho tuwhera ngā pūrongo hei tirotiro mā te iwi whānui, ā, ka whakaputaina ki te paetukutuku a te Kaitiaki Take Kōwhiri.

Ngā kaitono rārangi anake

Kāore e hiahiatia kia tuku pūrongo whakapaunga te kaitono rārangi kāore e whakataetae i tētahi rohe pōti.

Ko ngā whakapaunga pōti me ngā takoha ka riro mai me pūrongo e te rōpū.

Pūrongo mō ngā tāpui kōharinga

Ki te whiwhi i a koe te 5% neke atu rānei o ngā pōti mō ngā kaitono katoa i roto i te rohe pōti, me whakahoki ki a koe te moni tāpui $300 i utua i tō kōharinga. Kāore e taea te moni tāpui te whakahoki kia tukua rā anō e koe tō pūrongo o ngā whakapaunga pōti me ngā takoha. Mehemea nā tētahi rōpū koe i kōhari i runga i tōna rārangi kōharinga whakatōpū, kāore e whakahokia te moni tāpui kia tukua rā anō e ngā kaitono katoa ō rātou pūrongo.

Promote to MegaMenu: 

Wāhanga 4: Te rā pōti

Ka whakahuahua tēnei wāhanga i ngā ture motuhake ka pā i te rā pōti i mua i te katinga o te pōti.

Kaua e whakahau i te rā pōti

He mea aukati i te rā pōti (23 Mahuru) ngā mahi katoa (tae ki te pānuitanga) e whakatairanga ana i te pōtitanga o tētahi kaitono, rōpū rānei, e whakahē ana rānei i tētahi rōpū, kaitono rānei, ā, he toihara ki te ture. E rārangi ana ngā mahi katoa e rāhuitia ana i te wāhanga 197 o te Ture Pōti, me te rāhui anō i ēnei mahi e kīia ana he whakapōrearea, he whakaawe rānei i ngā kaipōti, tae atu ki ngā tira haere, ngā kauhau me ngā tauākī tūmatanui.

Me tino tūpato koe ki te ārai kei whai take tētahi ki te amuamu ki a koe, ki tō rōpū rānei.

I mua i te rā pōti, me tango, me taupoki rānei e koe i ō pānuitanga pōti katoa ka kitea i tētahi wāhi tūmatanui. Kua whakamana ngā Āpiha Whakahoki Pōti ki te tango, ki te taupoki rānei i ngā pānuitanga me te tuku nama ki te hunga nōna te hē.

Me tango, me taupoki rānei ngā tohu waka, tae atu ki ngā whakapiripiri āraituki. Kāore e taea te whakakite i te rā pōti ngā tī-hāte me ngā haki kei runga te ingoa, tohu, pepeha, moko rānei o tetahi rōpū, kaitono rānei. Mō konei, kāore e tūtohu mātou kia tohaina ngā whakapiripiri āraituki, tī-hāte me ngā haki mō te kaitono, te rōpū ranei. Ina tohaina, kāore koe e tino mōhio mēnā kāore tonu aua mea e whakaaturia i te rā pōti. Ka whakaraerae pea i a koe ō kaitautoko ki te mōrea o te toihara nā te kore mōhio.

Te tukunga rauemi pōtitanga

Kaua e tuku rauemi pōtitanga mā te mēra, tika rānei ki ngā pouaka mēra i te rā pōti. Kia āraia te takahi, e kore e whakaae a New Zealand Post ki te tuku mēra i muri i te Rāpare 14 Mahuru (ngā rā e 9 i mua o te rā pōti).

Hei whakaiti i te tūponotanga o te tuku mēra i te rā pōti, me whakarite ngā kaitono he mārama te kite he whai pānga ki te pōtitanga tētahi mēra.

Ki te mau ā-ringa koe, ō kaitautoko rānei i ētahi rauemi pōtitanga tika tonu ki ngā pouaka mēra i te Rāmere i mua o te rā pōti, me manako e koe te amuamu a ngā kaipōti e whakaaro ana i tae ake aua rauemi i te rā pōti.

Ka arotake te Kaitiaki Take Kōwhiri i ngā amuamu katoa, ā, ki te tika, ka tukuna atu ki ngā Pirihimana o Aotearoa.

Te whakapā ki ngā kaipōti

Tērā pea e pai ana koe ki te toro āwhina ki ngā kaipōti kia tae ki te wāhi pōti me te whakapā ki ngā kaipōti i te rā pōti mō taua take. Engari kāore e taea e koe te kōrero, te aha atu rānei e whakatītina ai rātou ki te pōti mōu, mō tō rōpū rānei.

Mēnā kei te whakapā ō kaitautoko ki ngā kaipōti mā te haere ki ngā whare, mā waea rānei, e tohutohu ana te Kaitiaki Take Kōwhiri kia hoatu e koe he kōrero ā-tuhi ki ō kaitautoko me te ako kia ū rātou ki tērā, kei puta i a rātou he kōrero e takahi i te ture.

Kaua te kōrero e whakahua i te ingoa o te kaitono me kore e hua he whakapae e whai ana te kaitautoko ki te hiki i te mana o te kaitono i te rā pōti. Ka taea e tētahi kaitautoko ā-waea te whakamōhio kei te waea atu ia mō te rōpū tōrangapū.

E pai ana mātou ki te tuku whakaaro ki a koe mēnā e ū ana tētahi kōrero ā-tuhi ki ngā ture mō te rā pōti.

Ngā paetukutuku

Kāore he tikanga kia tangohia ngā rauemi pōtitanga i tētahi paetukutuku i te rā pōti, engari anō ka wātea noa aua rauemi i te pae ki te hunga haere tūao ki reira. Kaua he mōhiohio hōu e whakamau ki te paetukutuku i te rā pōti. Kaua ngā pānuitanga e whakatairanga ana i te paetukutuku e whakaputaina i te rā pōti. Kāhore he whakawāteatanga pū mō te whakapuakanga tuihono o ngā whakaaro tōrangapū whaiaro o tētahi tangata i te rā pōti. Me āta whakarite koe kia kore e taea te tāpiri kōrero i te rā pōti ki ngā papa karere tūmatanui me ngā wāhi tākupu i tō paetukutuku, kia āraia pū te tarenga mōhiohio pōtitanga hōu ki te paetukutuku i mua i te 7 o ngā hāora i te pō. Ko ngā whakaritenga me mahi pea e koe kia kaua e takahia ai ngā ture, hei runga anō i te nui o te whakawhitiwhiti ki ētahi atu i te whārangi tukutuku, te paetukutuku rānei.

Ka pā anō aua ture ki te whakamahinga o te pāpāho pāpori, pēra i a Facebook me Twitter. Ki te whakamahi koe i ngā pāpāho pāpori, kaua e tare kōrero i te rā pōti e takahi ana pea i te ture.

E tohutohu ana te Kaitiaki Take Kōwhiri kia tāupāhohe rangitahi ai ngā kaitono i tō rātou whārangi whakahau Facebook kia āraia te mōrea o te kaitautoko e takahi ana i te ture mā te tiri ihirangi me te tare ki tō whārangi.

Mō ērā atu momo pāho pāpori e tare tākupu ai te tangata, e tohutohu ana te Kaitiaki Take Kōwhiri kia huri e koe ngā tautuhinga, ina taea, kia kaua e tare karere te tangata i mua i te 7 o ngā hāora i te pō o te rā pōti ka takahi pea i ngā ture.

Ka taea tonu te tare i te rā pōti ki ngā momo pāho pāpori ngā tare kāore tonu e pā ki te pōtitanga.

Ngā tohu whētui o te rōpū

Ka whakaaetia koutou ko ō kaitautoko ki te mau tohu whētui o te rōpū i ngā wāhi tūmatanui i te rā pōti. He tohu, he tohu ā-ripene rānei te tohu whētui ka mau ki te whētui kei runga anō te ingoa, te tohu, te pepeha, te moko rānei o te rōpū.

Kaua hoki te tohu whētui e whakaatu i runga waka, i ētahi atu wāhi rānei i te rā pōti.

Kaua tō ingoa, tō paetukutuku rānei e whakaatu i runga i te tohu whētui.

E tohutohu ana te Kaitiaki Take Kōwhiri kia tāpiri e ngā rōpū he tauākī kaiwhakatairanga ki ngā tohu whētui i te mea ka kitea pea aua tohu hei pānuitanga poti.

Ngā rīpene roa, ngā tohu rōhi, ngā rīpene, ērā mea

Ka taea ngā rīpene roa, ngā tohu rōhi (i tua atu i ērā ka whakamaua ki te whētui) ngā rīpene me ngā mea pērā i ngā tae o te rōpū te whakaatu i te rā pōti, engari i runga noa i te tangata, i te waka rānei, otiia, kaua rā ngā ingoa rōpū, ngā tohu, ngā pepeha, ngā moko rānei o te rōpū, tōu ingoa ake rānei.

Ngā kākahu e whakatairanga ana i te rōpū, i te kaitono rānei

Kaua ngā kākahu (pērā i ngā tī-hāte) e whakatairanga ana i te rōpū, i te kaitono rānei e whakaatu i te rā pōti.

Te haere ki ngā wāhi pōti

Me haere ngā kaitono rātou ko ngā kaitautoko (hāunga ia te kaitirotiro whakamana) ki te wāhi pōti ki te pōti anake. I muri i te tuku pōti, me wehe rātou. Kaua koe e tomo ki tētahi wāhi pōti ki te kōrerorero ki ngā kaitirotiro.

Ki te hiahia koe kia tango whitiāhua, whakaahua rānei i a koe e pōti ana, me mātua whiwhi i a koe te whakaaetanga a te Āpiha Whakahoki Pōti. Ka tukua te whakaaetanga i runga i te whakaritenga:

  • kia kaua te mahi whitiāhua, whakaahua rānei e whakararu i te wāhi pōti, otiia
  • kia kaua e mahia he uiuinga i te wāhi pōti, pātata rānei ki reira.

Ko te tono ki ngā rōpū me ngā kaitono kia matawhāiti i te takiwā o ngā wāhi pōti kia āraia te amuamu.

Ngā tohu Mema Pāremata

Ka taea ngā tohu whakamau kāore e pā hāngai ki te pōtitanga te whakaatu i te tari o te MP i waho o te Pāremata.

Ko ngā waka MP whai tohu ā-tuhi kei roto te ingoa rōpū, te tohu, pepeha, moko rānei, me kaua e whakaatu i te rā pōti.

Ngā pepa pōti āhua rite

Kaua rawa koe e tā, e tohatoha rānei tētahi mea āhua rite tonu ki te pepa pōti (tētahi wāhi rānei o te pepa pōti) i te rā pōti, i muri i te weherua rānei o te pō Rātū i mua i te rā pōti (Rātū 19 Mahuru) hei whakamahi ki te pōtitanga, kei roto anō he tohutohu, he mea rānei ka whakaawe i te kaipōti. Kaua rawa e tā, e tohatoha rānei i te rā pōti he kāri, he pepa rānei e whakaatu ana ngā kaitono, ngā rōpū rānei ahakoa kāore e rite ki te pepa pōti.

Promote to MegaMenu: 

Wāhanga 5: Te rēhita ki te pōti

Ka whakaratoa ki a koe i tēnei wāhanga ngā rā rēhita matua mō te tau pōtitanga me te whakahuahua i ngā rauemi me ngā mōhiohio rārangi ingoa ka wātea ki ngā kaitono mō te pōti.

Rā mutunga mō te rēhita

Ko te tangata kua rēhita taea noatia te Rāmere i mua o te rā pōti ka āhei ki te pōti i te pōtitanga whānui. Kei roto anō ko te tono rēhita whaimana me te tohu poutāpeta, te tohu rā rānei o te Kaitiaki Take Kōwhiri hei mea whiwhi i mua i te rā pōti.

Te whakahau whakahōu rēhitatanga

Kua whakatakoto hei te 26 Pipiri tīmata ai te whakahau whakahōu mō te pōtitanga whānui 2017, mā tētahi reta ka tukua ki ia kaipōti i tōna wāhi noho mēra onāianei kei te rārangi, kia āta whakarite he tika tōna rēhita, he rite hoki ia ki te pōti.

Ka whāia tērā ki te pānuitanga e mea ana ki te iwi ina kāore rātou i whiwhi mōkihi whakahōu me rēhita rātou, me whakahōu rānei ō rātou taipitopito kōrero.

Me rēhita rawa ngā kaipōti taea noa te rā karanga pōti (23 Hereturikōkā) kia tukua ai ki a rātou he kāri PōtiNgāwari. Ka tukua atu ngā kāri PōtiNgāwari ki ngā kaipōti hei te tīmatanga o te wā pōti tōmua.

Te akiaki i te rēhitatanga

He wāhi nui tā ngā kaitono ki te āki i ngā kaipōti kia rēhita, kia whai wāhi hoki ki te pōtitanga. Ka taea e mātou te whakarato ki a koe ētahi rauemi tino mārama hei whakamahi ki ō mahi kimi pōti.

Ka whakaratoa e mātou ngā rauemi whānui ki ngā reo maha kei roto nei te mōhiohio mō te rēhita me te pōti.

Kei tā mātou paetukutuku te mōhiohio mō te tā me te tono i ēnei rauemi, mā te whakapā rānei ki te Kaitiaki Take Kōwhiri. Haere ki www.elections.org.nz ka pāwhiri i te pātene “Resources & Learning”, īmēra: publications@elections.govt.nz waea rānei ki te Kaitiaki Take Kōwhiri (04) 495 0030.

Ka āhei hoki ngā rōpū, ngā kaitono me ngā Mema Pāremata te whakapā ki tō rātou Kairēhita o ngā Kaipōti ā-rohe kia whiwhi ki ngā rārangi kāinga noho kāhore nei he kaipōti rēhita.

Mōhiohio mō ngā rārangi me te rēhita

E whakarite ana te Ture Pōti kia āhei ngā kaitono te hoko mōhiohio pōtitanga ki te tārua mārō, te momo ā-hiko rānei mō ngā kaupapa o ō rātou whakahau.

Ka wātea hei hoko ngā rārangi tā mō te pōtitanga mai i te 11 Mahuru 2017.

Mō te mōhiohio mō te tukanga tono me ngā utu kua whakarite, īmēra ki data@elections.govt.nz, waea rānei ki te Kairuruku Raraunga i (04) 495 0030.

Te āta titiro ki tō rēhita

I mua i te kōharinga, me āta titiro e koe, me whakahōu hoki i ō taipitopito rēhita mēnā, hei tauira, kua nuku wāhi noho koe.

He māmā noa iho te tirotiro me te whakahōu i ngā taipitopito rēhita. Me haere ki tā mātou paetukutuku www.elections.org.nz, ka pāwhiri i te pātene “ENROL, CHECK OR UPDATE" (rēhita, tirotiro, whakahōu rānei) ka whai i ngā tohutohu.

Promote to MegaMenu: 

Wāhanga 6: Nga ara hei pōti

E whakaahua ana tēnei wāhanga i ngā ratonga pōti rerekē e wātea ana i Aotearoa me tāwāhi i te wā pōti tōmua, i te rā pōti hoki.

Ngā rauemi ka wātea mai

He wāhi nui tā ngā kaitono ki te kōrerorero ki ngā kaipōti me te akiaki kia whai wāhi rātou ki te pōtitanga. Ka taea e te Kaitiaki Take Kōwhiri te whakarato ki ngā kaitono ētahi rauemi tino mārama hei whakamahi i roto i a rātou mahi kimi pōti.

Ka whakaratoa e mātou ngā rauemi whānui ki ngā reo maha kei roto nei te mōhiohio mō ngā ara e pōti ai ngā kaipōti, tae ki ngā rauemi tā, ataata hoki i ngā hōputu māmā, Ingarihi Māmā, te Reo Rotarota o Aotearoa, me te hunga whai hauātanga ako.

Kei tā mātou paetukutuku te mōhiohio mō te tā me te tono i ēnei rauemi, mā te whakapā rānei ki te Kaitiaki Take Kōwhiri. Haere ki www.elections.org.nz ka pāwhiri i te pātene “Resources & Learning”, īmēra: publications@elections.govt.nz, waea rānei ki te Kaitiaki Take Kōwhiri (04) 495 0030.

Te mōkihi PōtiNgāwari mā ngā kaipōti

Hei te tīmatanga o te wā pōti tōmua ka whiwhi ia kaipōti ki te mōkihi mōhiohio whaiaro kei roto:

  • he kāri PōtiNgāwari (he reta rānei mēnā i tōmuri te rēhitatanga) hei mau ki te wāhi pōti
  • ngā taipitopito o ngā wāhi pōti me ngā wāhi pōti tōmua
  • ngā ingoa o ngā kaitono mō tōna rohe pōti
  • ngā rārangi rōpū mō aua rōpū e whakataetae ana i te pōti rōpū, otirā
  • ngā taipitopito whakapā o te Āpiha Whakahoki Pōti ā-rohe.

He pai tonu kia akiaki koe i ō kaitautoko kia whakamahi i te kāri PōtiNgāwari, te reta rānei, he tere hoki.

Nga ara hei pōti

Ko te tangata e taea tōna ingoa te tohu i te rārangi tā i te wāhi pōti, ka hoatu ki a ia he pepa pōti taketake.

Ko te tangata kāore e kitea i te rārangi tā, me te hunga e pōti i waho kē o te wāhi pōti, me pōti rātou i tētahi pōti motuhake. Kei roto i ngā pepa pōti motuhake he puka whakapuakanga, me whakaoti me haina hoki e te kaipōti. Tērā ētahi take kāore pea e kitea he kaipōti i te rārangi tā – hei tauira, mēnā i rēhita ia i muri i te rā karanga pōtitanga, i whakarārangitia i tētahi rohe pōti kē, kei te rārangi huna, kāore rānei i rēhitatia.

Ko ngā kaipōti ka pīrangi kia āwhinatia hei pānui, hei tohu rānei ngā pepa pōti, ka taea te āwhina e tētahi hoa, whanaunga, āpiha pōtitanga rānei i te wāhi pōti.

Te pōti tōmua

Hei te Rāhina 11 Mahuru tīmata ai te pōti tōmua.

Ka wātea ki ngā kaipōti tōmua e wehe atu ana i Aotearoa i mua i te tīmatanga o te pōti tōmua he ratonga whāiti mai i te 6 Mahuru i te Āpiha Whakahoki Pōti.

Ko ngā kaipōti kua tā ki te rārangi kaipōti kei te wāhi pōti, kāore he tikanga kia mahia he whakapuakanga ā-tuhi kia pōti tōmua rātou.

Ina kāhore i rēhita te kaipōti, ka āhei ia ki te whakakī i te puka rēhita i te wāhi pōti tōmua, mā te rēhita tuihono rānei, i tētahi PostShop, i te Kairēhita o ngā Kaipōti rānei. Ina whiwhia e te Kairēhita o ngā Kaipōti, e te Kaitiaki Take Kōwhiri rānei, te tono rēhita a tētahi kaipōti i mua i te rā pōti, ka tatauria tana pōti.

Ka whakaratoa hoki ngā ratonga pōti tōmua hei waka haere – hei tauira, he whare wīra ka nuku i tētahi takiwā ki tētahi atu. Ka whakamahia nuitia ai ngā waka haere pōti tōmua i ngā rohe pōti tuawhenua rahi rawa me whakarato ki reira te ratonga pōti ki ngā taupori tino marara.

Ka wātea te mōhiohio mō ngā wāhi pōti tōmua me ngā ratonga waka haere i muri i te rā kōharinga i www.elections.org.nz.

Te pōti i te rā pōti

Ka āhei ngā kaipōti ki te pōti i te wāhi pōti mai o te 9 i te ata tae ki te 7 i te pō o te rā pōti (23 Mahuru). Ka kati ngā kūwaha i te 7 o ngā hāora i te pō – ka waiho te tangata i te wāhi pōti i te 7 o ngā hāora kia whakaoti i tana pōti.

Kāhore he tikanga kia rēhitatia te kaipōti ki tētahi rohe pōti e pōti ai ia i taua rohe. E āhei ana te kaipōti ki te pōti i tētahi wāhi pōti huri noa, ahakoa tōna ake rohe rēhita. Kāore e taea e te kaipōti te rēhita i te rā pōti.

Te tuku pōti motuhake i te wāhi pōti, i te wāhi pōti tōmua rānei

Me tuku pōti motuhake te kaipōti ki te mea:

  • kāhore ia i runga i te rārangi tā ka whakamahia hei tuku pōti noa i te wāhi pōti
  • kāhore rānei ia i rēhita tae ki te rā karanga pōtitanga, tērā rānei
  • kei te rārangi huna ia.

I te wāhi pōti tōmua, wāhi pōti rānei ka hoatu ki ēnei kaipōti he puka whakapuakanga hei whakakī me āna pepa pōti.

Ngā hōhipera me ngā kāinga whakaahuru

Ka haere ngā kapa tuku pōti ki ngā hōhipera me ngā kāinga whakaahuru ki te tuku pōti ki ngā tūroro me ngā kainoho i ngā rā 12 i mua o te pōtitanga. Ka haere tahi me rātou he Kaiwhakawā Tūmatanui.

Hei te rā pōti kei ētahi hōhipera nui he wāhi pōti mō ngā kaimahi, ngā manuhiri me ngā tūroro ka āhei tonu ki te hīkoi haere. Hei te rā pōti ka haere hoki ngā kapa pōti ki ngā hōhipera nui.

Te pōti tiki atu me te pōti mēra

Ko te kaipōti kāore e tae ki te wāhi pōti, e āhei ana ia te whakarite kia tīkina āna pepa pōti motuhake, kia mēra ki a ia rānei.

Me tono e te kaipōti mā:

  • te tuhituhi – ko te tikanga ka whakaoti ngā kaipōti i te tono mō ngā pepa pōti whakapuakanga motuhake kei roto i te mātārere Kāore e taea te haere ki te wāhi pōti tērā rānei
  • mā te waea tuhi, te īmēra, te waea rānei ki te Āpiha Whakahoki Pōti.

Ka taea he whanaunga, he hoa, he māngai rōpū, he tangata kē rānei te whakaingoa hei tiki i ngā pepa pōti tiki atu mō te kaipōti. Ka taea ngā pepa pōti motuhake te kohikohi i te wāhi pōti, i te tari matua rānei o te Āpiha Whakahoki Pōti i roto i ngā hāora tuwhera o te wā pōti.

Me tuku te tono mō ngā pepa pōti whakapuakanga motuhake mā te mēra, te waea tuhi, te īmēra rānei ki te tari rohe pōti matua o te Āpiha Whakahoki Pōti. Ka whakaputaina ngā taipitopito whakapā o te Āpiha Whakahoki Pōti mō te pōtitanga whānui ki www.elections.org.nz.

Ina tono he kaipōti mō ngā pepa pōti mēra, me whai whakaaro te kaipōti ki te wā rawaka e whiwhia ai, e whakahokia ai anō ngā pepa pōti.

Me whiwhi e te Āpiha Whakahoki Pōti, e te wāhi pōti rānei ngā pepa pōti whakakī i mua tonu o te 7 o ngā hāora i te pō o te rā pōti. Me whai tohu poutāpeta nō mua o te rā pōti ngā pōti i whakahokia mā te mēra, me tae hoki ki te Kaitiaki Take Kōwhiri, ki te Āpiha Whakahoki Pōti rānei, i mua i te poupoutanga o te Rāapa i muri i te rā pōti (Rāapa 27 Mahuru).

Ka taea e tētahi kaitono te kōhari tangata ka whakamanahia e te Āpiha Whakahoki Pōti hei kaiwhakaatu o ngā whakapuakanga pōti motuhake hei āwhina i ngā tāngata me pōti i te kāinga (he kaiwhakaatu whakamana). Tirohia te Wāhi 7 mō ētahi mōhiohio anō.

Te pōti āhukareo

Ka wātea ki ngā kaipōti matapō me ngā kaipōti atarua, ngā kaipōti whai hauātanga ōkiko rānei e āraia ai rātou i te tohu tūwehe, te tohu hunahuna ki te pepa pōti. Me rēhita ngā kaipōti ki te Kaitiaki Take Kōwhiri hei whakamahi i te ratonga i mua i te 5 i te ahiahi o te Rāpare 21 Mahuru.

Ka wātea ētahi mōhiohio anō mō tēnei ratonga i www.elections.org.nz i ngā rā i mua i te pōtitanga whānui.

Te pōti herehere

I roto i ngā rā 12 i mua i te pōtitanga, ka haere ngā kapa pōti haere ki ngā whare herehere ka whakatū ai he wāhi pōti mō ngā herehere e āhei ki te pōti. Kāore e āhei ki te pōti ngā herehere kua tuku ki te whare herehere, engari ka whakaratoa ki te hunga e tatari ana kia whiua e te kōti. Ka kōrero tahi ngā Āpiha Whakahoki Pōti me ngā Ratonga Poropeihana ā-rohe kia whakaratoa he wāhi pōti mō ngā mauhere i te kāinga me ērā atu whiunga ā-hāpori.

Ka haere hoki ngā kapa ki ngā teihana pirihimana o te rohe pōti i muri tata iho o te poupoutanga o te rā pōti, kia pōti ai ngā kaipōti rēhita e mau ana i ngā heremanga pirihimana.

Te pōtitanga i tāwāhi

Ka āhei ngā kaipōti i tāwāhi ki te whiwhi pepa pōti mā:

  • te tikiake i ngā pepa i te paetukutuku o te Kaitiaki Take Kōwhiri
  • te tono ki te Kaitiaki Take Kōwhiri kia tukua ā rātou pepa pōti mā te mēra, tērā rānei
  • te pōti ā-tinana i tētahi wāhi pōti kua whakaritea i tāwāhi.

Ka āhei ngā kaipōti i tāwāhi ki te whakahoki i ā rātou pepa pōti mā:

  • te tukuatu i ā rātou pepa pōti ki tētahi tūmau haumaru i te paetukutuku o te Kaitiaki Take Kōwhiri
  • te waea tuhi i ā rātou pepa pōti ki te Kaitiaki Take Kōwhiri
  • te mēra i ā rātou pepa pōti ki te Kaitiaki Take Kōwhiri, anō rānei
  • te mēra, te mau ā-ringa rānei i ā rātou pepa pōti ki te wāhi pōti tata i whakaritea i tāwāhi.

Me whiwhi te Kaitiaki Take Kōwhiri ki ngā pōti waea tuhi me ngā pōti ka whakahoki mā te tukuatu i tāwāhi, i mua i te 7 o ngā hāora i te pō o te rā pōti. Me whai tohu poutāpeta o tētahi whenua kē ngā pōti mēra, nō mua noa, nō te rua rānei o ngā rā o mua noa o te pōtitanga, me tae hoki ki te Kaitiaki Take Kōwhiri, tētahi Āpiha Whakahoki Pōti rānei, i mua o te poupoutanga o te Rātū, ngā rā 10 i muri i te pōtitanga.

Ka wātea te mōhiohio mō te pōti i te wāhi pōti o tāwāhi i www.elections.org.nz i ngā rā i mua o te pōtitanga whānui.

Promote to MegaMenu: 

Wāhanga 7: Ngā kaitirotiro me ngā kaiwhakaatu pōti motuhake

Ka whakamārama tēnei wāhanga i ngā wāhi o te pōtitanga e taea ai te kōhari kaitirotiro hei mātaki, te whakaako anō i ngā kaiwhakaatu pōti motuhake.

Whakatūnga

Ka taea e koe te kōhari kaitirotiro me ngā kaiwhakaatu pōti motuhake. Me tino whakaako ngā kaitirotiro me ngā kaiwhakaatu pōti motuhake ki ō rātou motika me ō rātou kawenga.

Ka wātea he Scrutineer Handbook – General Election 2017, i te Kaitiaki Take Kōwhiri, te Āpiha Whakahoki Pōti, www.elections.org.nz rānei.

Mā te Āpiha Whakahoki Pōti e whakaako ngā kaiwhakaatu pōti motuhake.

Kāore e taea te kōhari tētahi kaitono hei kaitirotiro.

Te mahi a ngā kaitirotiro

Ka taea e koe te whakatū kaitirotiro hei mātaki i te whakahaerenga o te pōtitanga i ēnei tūāhua:

Ngā wāhi pōti me ngā wāhi pōti tōmua

Ka āhei ō kaitirotiro ki te mātaki i te tukunga pōti i te rā pōti me te pōti tōmua, me te tatau tīmata i ngā wāhi pōti i muri i te 7 i te ahiahi. Kia kaua ngā kaitirotiro o ia kaitono i te wāhi pōti i te wā kotahi e nui atu i ngā āpiha tuku pōti i whakaritea mō taua wāhi pōti.

Ka taea e ngā kaitirotiro te:

  • tono ki tētahi āpiha tuku pōti kia uia he kaipōti e whakaaro ana te kaitirotiro kei te whakataruna, kei te pōti takirua rānei
  • whakawhitiwhiti ki ngā kātipa rōpū ngā ingoa o ngā tāngata kua pōti i te wāhi pōti
  • tirotiro te tatau tōmua.

Kaua rawa ngā kaitirotiro e kōrero ki ngā kaipōti, e āwhina rānei i te tatau pōti.

Ka taea e ngā kaitirotiro te whakamahi rorohiko pona/paparorohiko, engari kia whāiti rawa ngā whakaritenga. Kāore e whakaaetia ngā kaitirotiro kia whai wāhi ki ngā mahi i aua pūrere e wāhia ai pea te muna me te pono o te wāhi pōti.

Ka taea ngā rorohiko pona, ngā paparorohiko rānei te whakamahi anake ki te tuhi ingoa, tau whārangi, tau raina hoki. Kāore e whakaaetia te tākupu ki ngā pāpāho pāpori, mā te whakamahi ataata, kāmera rānei.

Ki te āwangawanga ngā kaitirotiro ki te whakahaerenga pōtitanga i tētahi wāhi pōti, me kōrero ēnei ki te Kaiwhakahaere o te Wāhi Pōti.

Te tatau tuatahi o ngā pōti tōmua

Kia kotahi te kaitirotiro o ia kaitono e haere ki te tatau tuatahi o ngā pōti tōmua i te tari matua o te Āpiha Whakahoki Pōti, ka tīmata mai i te 9 o te ata o te rā pōti.

Ka whakamōhio te Āpiha Whakahoki Pōti i a koe ki te wā tīmata o te tatau tuatahi mō te rohe pōti. Kāore e āhei ngā kaitirotiro te wehe i te wāhi tatau rāhui i te tari matua o te Āpiha Whakahoki Pōti i mua i te katinga o ngā pōti i te 7 i te ahiahi, ki te kāhore e whakaae te Āpiha Whakahoki Pōti.

Ngā whakapuakanga pōti motuhake

Ka taea e ngā kaitirotiro te haere ki te tari o te Kairēhita o ngā Kaipōti ki te tirotiro i te whakatauritenga o ngā whakapuakanga pōti motuhake ki ngā rārangi pōti, e tīmata hei te Rāapa i muri i te rā pōti. Kotahi anake te kaitirotiro ki ia kaitono e āhei ana i te wā kotahi.

Te tirotiro i ngā rārangi pōti me te tatau whaimana

Ka āhei koe ki te kōhari i tētahi kaitirotiro kotahi hei haere ki te tirotiro i ngā rārangi pōti me te tatau whaimana i te tari matua o te Āpiha Whakahoki Pōti, engari ia ki te whakaae te Āpiha Whakahoki Pōti ki ētahi atu.

Te whakawā tatau tuarua

Ka āhei koe ki te kōhari i tētahi kaitirotiro kotahi hei haere ki te tatau tuarua kaiwhakawā o ngā pōti rohe pōti, engari ia ki te whakaae te Kaiwhakawā ki ētahi atu.

Ngā hōhipera me ngā kāinga whakaahuru

Ka taea e ngā whakahaere rōpū ā-rohe, ina whakaae te rangatira o te hōhipera, te kāinga whakaahuru rānei, te kōhari he kaitirotiro hei haere tahi me te āpiha pōti ka tuku i ngā pōti hōhipera i te rā pōti, i mua rānei.

Te whakatū kaitirotiro

I mua i te whakaaetanga hei kaitirotiro, me mātua whakapuaki ngā kaitirotiro katoa e kore te muna o te pōtitanga e takahia e rātou. Ka whakaratoa te whakapuakanga i te Scrutineer Handbook – General Election 2017 ka wātea rānei i te Āpiha Whakahoki Pōti, otirā me mahi i mua i tētahi āpiha pōti, Kaiwhakawā Tūmatanui, rōia rānei.

Me tuhi ngā kōharinga kaitirotiro me tō waitohu i te taha. Me hoatu e koe ki ō kaitirotiro he tārua o tā rātou kōhari ā-tuhi hei whakakite ki ngā āpiha pōti. Ka taea hei puka kōhari te mea taketake, te waea tuhi, te tārua whakaahua rānei. Me tautuhi te wāhi pōti, te wāhi pōti tōmua hoki/rānei kua kōhari ai te kaitirotiro. Me tautuhi anō mēnā i whakatū te tangata mō te tatau tōmua, mō te tirotiro whakapuakanga pōti motuhake, mō te tatau whaimana hoki/rānei.

Kei te Scrutineer Handbook he puka kē ka taea te whakamahi hei kōhari kaitirotiro.

Ngā kaiwhakaatu pōti motuhake

Ka taea e koe te kōhari tāngata e whakamana ai te Āpiha Whakahoki Pōti hei kaiwhakaatu mō ngā whakapuakanga pōti motuhake. Me tuhi ngā kōharinga me tō waitohu i te taha. Hei whakaatu ēnei tāngata ki ngā whakapuakanga a ngā kaipōti kāore e tae atu ki tētahi wāhi pōti i te rā pōti.

Ka taea e te Āpiha Whakahoki Pōti te:

  • whakahē tētahi kōharinga, engari me hōmai he whakamārama, tērā rānei
  • te whakakāhore he whakaaetanga mēnā kāore te tangata kōhari e ū ki ngā ture kaiwhakaatu mō ngā whakapuakanga pōti motuhake.

Kāore ngā Āpiha Whakahoki Pōti e whakamana i ngā kaiwhakaatu pōti motuhake kia ākona rā anō rātou ki tā te Āpiha Whakahoki Pōti i pai. Ka pēnei me kore me kore e tupea ngā kaipōti i tō rātou mana pōti mā ngā tikanga hē. Mā te Āpiha Whakahoki Pōti koe e tohutohu ki ngā wā ako mō ngā kaiwhakaatu pōti motuhake.

Promote to MegaMenu: 

Wāhanga 8: Ngā otinga o te pōtitanga whānui

Ka whakamārama tēnei wāhanga hei āwhea, he pēwhea anō e tatauria ngā pōti, e whakaputaina ngā otinga, tae ki ngā tukanga mō te tatau anō, te petihana pōti rānei.

Ngā otinga tuatahi – te pō pōti

Hei te katinga o te wāhi pōti i te 7 o te pō pōti me te wehenga o ngā kaipōti katoa, ka tatau e te kaiwhakahaere o ia wāhi pōti he tatau tuatahi o ngā pōti i te aroaro o ngā kaitirotiro me ngā āpiha o te wāhi pōti.

Ka huakina ngā pouaka pōti, ā, ka tatauria ngā pōti rōpū me ngā pōti rohe pōti. Ka waeahia te otinga ki te Āpiha Whakahoki Pōti, kātahi ka whakaurua ki te Pūnaha Otinga Pōtitanga ā-Motu o te Kaitiaki Take Kōwhiri. Ka whakaaturia wā-tūturu tonu ngā otinga ki www.electionresults.govt.nz ka tukua hoki ki ngā kaipāpāho pouaka whakaata me reo irirangi. E whai ana mātou kia wātea mai te 50% o ngā otinga pōti i te 10 o ngā hāora o te pō pōti, me te 100% o ngā otinga wāhi pōti hei te 11.30 o te pō.

Kāore ngā pōti motuhake i ngā wāhi pōti e huakina, me tatari ki te tatau whaimana.

Ngā pōti tōmua

Hei te Rāhina 11 Mahuru tīmata ai te pōti tōmua mō te pōtitanga whānui. Ka tatauria ngā pōti tōmua (i tua atu i ngā pōti tōmua motuhake) mai o te 9 i te ata o te rā pōti i te tari matua o te Āpiha Whakahoki Pōti ina āhei ia te whakarato i te wāhi haumaru. Ka rerekē te wā tīmata i ngā rohe pōti rerekē. Mā te Āpiha Whakahoki Pōti e whakamōhio ki ngā kaitono te wā tīmata mō te rohe pōti.

Ka whakahaeretia ngā tatau i ngā wāhi haumaru wehe kē. Me noho ngā āpiha pōti me ngā kaitirotiro i te wāhi haumaru mō te tatau tīmata o ngā pōti tōmua tae ki te 7 o ngā hāora o te pō.

E whai ana mātou kia wātea ngā otinga o ngā pōti tōmua taea noatia te 8.30 i te pō.

Ngā otinga whaimana

Ka whakahiatotia ngā otinga whaimana i te tari matua o te Āpiha Whakahoki Pōti mā tētahi tikanga tino raupapa ka tīmata te rā i muri mai o te rā pōti. Ka āta tirohia, ka āta tātaritia ngā rārangi pōti hei whakahiato he rārangi o ngā tāngata i pōti (te rārangi matua) hei mōhio ki ngā kaipōti i pōti takirua. Ka tatauria anō ngā pōti katoa i tatau i te pō pōtitanga, ka āta tirohia hoki kei te tika.

Ka āta tirohia anō e te Āpiha Whakahoki Pōti te tika o ngā puka whakapuakanga pōti motuhake katoa me ngā ingoa o ngā kaipōti motuhake ki ngā rārangi rohe pōti me te rārangi o ngā rēhitatanga tōmuri o te rohe. Ki te āhei tētahi kaipōti motuhake ki te pōti motuhake, ā, ka kitea tōna ingoa i te rārangi ka tatauria te pōti. Ka kuhuna hoki ki te tatau ngā pōti rōpū o ngā kaipōti rēhita i pōti ki ngā pepa pōti mō te rohe pōti hē.

Ki te kore tētahi ingoa e kitea, ka tukuna atu te puka whakapuakanga ki te Kairēhita o ngā Kaipōti kia āta tirohia te āhei o te kaipōti motuhake ki te pōti. Ki te whakaū te Kairēhita kua rēhita te kaipōti ki te rohe pōti, ka tatauria te pōti.

Ka tīmata te tukanga otinga whaimana i te Rātapu i muri i te rā pōti (24 Mahuru) engari kāore e oti kia tae rā anō mai te rā tōmuri ā-ture mō te whiwhinga pōti motuhake nō ērā atu rohe pōti me ngā Āpiha Whakahoki Pōti o tāwāhi, arā, ētahi rā 10 ake o te rā pōti (Rātū 3 Whiringa-ā-nuku).

Ka tūmanako mātou ka whakaputaina ngā otinga whaimana o te pōtitanga whānui ētahi rā 14 ake o te rā pōti (7 Whiringa-ā-nuku) mā te pānui i te Kāhiti.

Ka wātea hoki ngā otinga i www.electionresults.govt.nz.

Te pōtitanga o ngā kaitono

Ka whakaputaina ngā otinga whaimana (ka puakina hoki ngā tatau tuarua o ngā rohe pōti) ka whakahokia ki te Karaka o te Whare Pāremata te tuhinga karanga pōtitanga me ngā ingoa o ngā kaitono rohe pōti angitu me te whakamana ki muri. Ko te tuhinga karanga pōtitanga te pānui ā-tuhi mai i te Kāwana-Tianara e whakahau ana i te Kaitiaki Take Kōwhiri kia whakaritea he pōtitanga pāremata.

Ko reira whakatau ai te Kaitiaki Take Kōwhiri i ngā kaitono rārangi kua pōtitia mā te whakamahi i tētahi tātai ā-ture. Ka whakaputaina e te Kaitiaki Take Kōwhiri he pānui i roto i te Kāhiti hei whakapuaki i te pōtitanga o ngā kaitono rārangi.

E tūmanako ana te Kaitiaki Take Kōwhiri ka whakapuakina tēnei hei te Rāpare 12 Whiringa-a-nuku, i runga anō i ngā tono tatau tuarua.

Te whakawā tatau tuarua

I muri i te whakapuakanga o ngā otinga whaimana, ka taea e ngā kaitono rohe pōti te tono ki tētahi Kaiwhakawā Kōti ā-Rohe mō te tatau tuarua o te pōti ā-rohe.

Me pēnei te tono:

  • me tuku i roto i ngā rā mahi e toru o te whakapuakanga o te otinga (Rāapa 11 Whiringa-a-nuku), ā
  • me tāpiri anō he moni tāpui $1000 (kei roto nei te tāke hokohoko).

Ki te hiahia koe ki te tono tatau tuarua, ka tuku mōhiohio te Kaitiaki Take Kōwhiri ki a koe mō te tukanga hei whai māu.

Ko ngā hēkeretari o ngā rōpū anake e āhei te tono tatau tuarua o te pōti rōpū. Mō ētahi mōhiohio anō tirohia te Party Secretary Handbook – General Election 2017.

Ngā petihana pōtitanga

Kotahi te tikanga tuma mō te pōtitanga o tētahi kaitono rohe pōti, ko te petihana pōtitanga. Ka taea e tētahi kaipōti, kaitono rānei te whakatakoto petihana, ā, ka rongona e ngā Kaiwhakawā Kōti Matua tokotoru. Me whakatakoto te petihana i roto i te 28 rā o te whakapuakanga o ngā otinga whaimana (Rāhina 6 Whiringa-a-rangi).

Ko te hēkeretari anake o tētahi rōpū e whakataetae ana i te pōti rōpū te āhei ki te tuma i te pōtitanga o ngā kaitono rārangi. Mō tēnei, ka whakatakoto petihana ia ki te Kōti Pīra.

Promote to MegaMenu: 

Āpitihanga A: Whakarāpopoto o ngā ture pānuitanga pōti mō ngā kaitono rohe pōti

Te pānuitanga pāhotanga
Āhea whakaaehia ai ngā pāhotanga
Me whakamana e1
He whakapaunga kaitono rohe pōti?
He kaitono e whakatairanga ana i te rōpū, i te kaitono me te rōpū, e tātā rōpū kē ana rānei, kaitono kē rānei Kāore e whakaaetia Kāore e hāngai Kāore e hāngai
Te whakatairanga kaitono rohe pōti anake (kāhore te pūtea pāho2)

Wā pōtitanga
(23 Hereturikōkā ki 22 Mahuru)

Kaitono rohe pōti Āe (he takoha hoki te wāriu mēnā nā te rōpū i utu, nā te kaitautoko whakahau rānei)
He pānuitanga pāhotanga-kore
Te wā kei roto nei ka whakaritea he whakapaunga pōti3
Me whakamana e1
He whakapaunga kaitono rohe pōti?
Te whakatairanga i te rōpū, te tātā rōpū rānei, kaitono rānei Te wā whakarite
(23 Pipiri ki 22 Mahuru)
Te hēkeretari o te rōpū Kāo
Te whakatairanga i te kaitono rohe pōti me te rōpū Te wā whakarite
(23 Pipiri ki 22 Mahuru)
Te hēkeretari o te rōpū me te kaitono rohe pōti Āe (mō te utu o te wāhanga o te pānuitanga e pā ana ki te kaitono rohe pōti)
Te whakatairanga i te kaitono rohe pōti Te wā whakarite
(23 Pipiri ki 22 Mahuru)
Te kaitono rohe pōti Āe

1 Kei te Wāhianga 2 o tēnei pukapuka te mōhiohio mō ngā whakaritenga e pā ana ki te whakamanatanga ā-tuhi me te tauākī kaiwhakatairanga.
2 Ko ngā tohutohu mō te whakamahi i te pūtea pāho mō te pānuitanga ka whakatairanga i tētahi kaitono ka kitea i te Party Secretary Handbook – General Election 2017.
3 Kāhore he rāhuitanga ki te wā e whakaputaina ngā pānuitanga kore-pāpāho, engari kāore e taea te whakaputa i te rā pōti.

Promote to MegaMenu: 

Āpitihanga B: Tāngata whakapā whaitake

Mō te mōhiohio mō... Māngai Tangata whakapā

Te whakahaere i ngā ratonga mō te rēhitatanga me te pōti

Ka whakaputaina e mātou he whānuitanga o ngā rauemi, i ngā reo maha, mō te rēhitatanga me te pōti ka taea te tono mā tō mātou paetukutuku, mā te īmēra rānei

Te hoko rārangi tā me te raraunga rārangi ā-hiko

Ngā kōharinga, te pōtitanga pāremata, ngā pōti motuhake me ngā wāteatanga rārangi

Te tohutohu mō ngā ture pōtitanga tae ki ngā whakaaro tohutohu mehemea he pānuitanga pōti tētahi rauemi

Ngā rohe pōtitanga pāremata

Te Kaitiaki Take Kōwhiri

Waea āwhina: 0800 36 76 56
Tari ā-motu: 04 495 0030
Ngā pātai arowhānui:
enquiries@elections.govt.nz
Ngā tono rauemi:
publications@elections.govt.nz
Ngā tono raraunga rārangi ingoa:
data@elections.govt.nz
Ngā tono mō ngā whakaaro tohutohu:
advisory@elections.govt.nz
Ngā paetukutuku Kaitiaki Take Kōwhiri:
www.elections.org.nz
www.electionresults.govt.nz

Te uru ki ngā ture, tae ki te Ture Pōti 1993 Tari Tohutohu Pāremata www.legislation.govt.nz
Ngā ratonga whakahaere me te tautoko ki ngā MP me ngā pūtea ka taea e ngā MP Ratonga Pāremata

Waea 04 817 9999
publicity@parliament.govt.nz

Me pēhea te whakapā ki ngā kaunihera ā-rohe mō, hei tauira, ngā ture tohu Ngā Kaunihera ā-Rohe o Aotearoa

He rārangi o ngā kaunihera katoa, ngā mahere me ngā paetukutuku ka wātea mai i:

http://www.lgnz.co.nz/nzs-local-government/new-zealands-councils/
 

Puakina ō whakaaro mō te ture e pā ana ki ngā pōtitanga pāremata mā te Uiui ki ia pōtitanga ka whakahaeretia e te komiti whiriwhiri Te Komiti Whiriwhiri mō te Ture me te Pōtitanga

Justice.Electoral@parliament.govt.nz

https://www.parliament.nz/en/pb/sc/scl/justice-and-electoral/

Te mōhiohio me ngā amuamu mō te pānuitanga Mana Whanonga Pānuitanga

Waea 04 472 7852
Īmēra: asa@asa.co.nz
www.asa.co.nz

Te mōhiohio me ngā amuamu mō te pāho Mana Whanonga Kaipāho

Waea 04 472 7852
Īmēra: asa@asa.co.nz
www.asa.co.nz

Te mōhiohio me ngā amuamu mō te nūpepa Kaunihera Nūpepa www.presscouncil.org.nz
Te mōhiohio me ngā rauemi me pēhea te papare i a koe i te ipurangi National Cyber Policy Office, Department of Prime Minister and Cabinet www.connectsmart.govt.nz
Aratohu mō te tau pōti: Te mōhiohio mō ngā kaimahi kāwanatanga ka tū hei kaitono Te Kōmihana o ngā Tari Kāwanatanga www.ssc.govt.nz
Ngā ratonga tautaka   www.nztcinternational.com
www.dia.govt.nz
Te whakarato mōhiohio ki ngā hōputu urunga mō te hunga kāpō Blind Foundation Waea 0800 24 33 33
www.blindfoundation.org.nz
Tautoko hunga turi me ngā ratonga reo rotarota   www.deafradio.co.nz
www.slianz.org.nz
www.deaf.org.nz
www.nfd.org.nz

 

Promote to MegaMenu: