Ngā Rohenga Pōti 2014 – Ngā whakarerekētanga matua

Kua whakapūmautia ngā rohenga pōti mō ngā pōtitanga whānui e rua e whai ake, otirā kua whakarerekēhia ngā rohenga o ngā rohe pōti e 46, tae atu ki tētahi rohe pōti Whānui hōu i Tāmaki Makaurau.   Kāore i whakarerekēhia ngā rohe pōti Whānui e 20 me ngā rohe pōti Māori e rima.

Ngā Rohe Pōti Whānui o Te Ika-a-Māui

Kua piki te maha o ngā rohe pōti mō te rohe o Tāmaki Makaurau mai i te 23 ki te 24.  Ko ngā whakarerekētanga matua:

  • Kua waihangahia a Upper Harbour mā te whakahiato mai i te nuinga o te taupori mai i ngā rohe pōti o East Coast Bays me Helensville i te raki me Te Atatū i te tonga.
  • Kua waihangatia a Kelston mai i ngā rohe pōti onāianei o Waitakere, Te Atatū, Mt Albert me New Lynn.
  • Kua whakakapihia te rohe pōti o Waitakere nā ngā whakarerekētanga rohenga ki ngā rohe pōti o Te Atatū me Helensville me te rohe pōti hōu o Kelston.
  • Kua riro atu he taupori mai i Helensville ki a East Coast Bays, Upper Harbour me Te Atatū, engari kua whiwhi taua rohe pōti i ngā wāhi tuawhenua taiuru o Waitakere me New Lynn me tētahi wāhanga o Rodney.
  • Kua riro atu he taupori mai i Auckland Central ki a Mt Albert i Westmere me Grey Lynn, engari kua whiwhi taupori i te takiwā o Grafton mai i Epsom.
  • Kua whiwhi taupori a Mt Roskill mai i Maungakiekie i Royal Oak, mai i Mt Albert hoki i Sandringham, ā, kua riro atu he taupori ki a New Lynn mai i New Windsor.
  • Ahakoa i riro atu he taupori i Maungakiekie ki a Mt Roskill, kua whiwhi taupori mai i Tāmaki me Manukau East.
  • Kua tangohia he taupori i Hunua, ka riro i a Botany i te takiwā o Flat Bush, i a Waikato hoki  i te takiwā ki te tonga, ka mutu kua whakatutukihia ngā whakatikatikatanga ki ngā rohenga o te raki me te tonga o te rohe pōti o Papakura.

Ko ētahi atu o ngā whakarerekētanga matua i Te Ika-a-Māui:

  • Kua riro atu i te rohe taiwhenua o te uru o Hamilton West he taupori ki Taranaki-King Country me te whiwhi taupori mai i Hamilton East me Waikato i Horsham Downs
  • Kua puritia e Tauranga te takiwā o Pyes Pa engari kua utua ngā whakatikatikatanga ki te rohe pōti o Bay of Plenty kia uru atu ngā wāhi o Ōmanu me Poike.
  • Kei roto i a Rotorua ko Te Puke me te rohe karapoti o te uru, i whakawhitia mai i Bay of Plenty.
  • Kei roto i a East Coast ko Kawerau me te taha moana o Maketu mai i Rotorua, ā, kua riro atu he taupori i te tonga ki a Napier.
  • Kua whakawhānuihia a Whanganui ki te raki o Stratford, ā, kua riro atu te wāhi taha moana i te taha uru o te maunga o Taranaki ki a New Plymouth.
  • Kua whiwhi a Ōhāriu i a Wadestown mai i Wellington Central, ā, kua riro tana taupori i Korokoro me Maungaraki ki a Hutt South.  Kua whakaurua he tohutō tuarua ki te ingoa o taua rohe pōti hei āwhina i te whakahua tika o te ingoa. 
  • Kei roto i a Hutt South ināianei ko te takiwā katoa o Western Hills, nā tēnei i whakatikahia a Rimutaka, ina kua whiwhi ia i a Naenae mai i Hutt South.

Kāore he whakarerekētanga a te Kōmihana ki ēnei rohe pōti tekau mā toru o Te Ika-a-Māui e whai ake nei: Northland, Whangarei, Northcote, North Shore, Manurewa, Māngere, Pakuranga, Taupō, Tukituki, Wairarapa, Palmerston North, Mana me Rongotai.

Ngā Rohe Pōti Whānui o Te Waipounamu

E pūmautia ana ngā rohe pōti i Te Waipounamu ki te 16 i raro i te Ture Pōti.

E hiahiatia ana ngā whakarerekētanga rohenga i te takiwā o Ōtautahi nā te nui o te nekehanga taupori mai i ngā rohe pōti o Christchurch East, Christchurch Central me Port Hills.  Me te aha kua piki ngā taupori o Waimakariri, Wigram me Selwyn i te tepenga taupori pōti e whakaaehia ana. 

Ko ngā rerekētanga matua:

  • Kua riro atu he taupori o Waimakariri i Marshlands ki a Christchurch East, i Redwood hoki ki a Christchurch Central.
  • Kua riro mai anō i a Christchurch East he taupori mai i a Christchurch Central i Shirley me Richmond, Avonside me North Linwood (ka nekehia ngā wāhi whero i Christchurch Central ki Christchurch East) ka mutu mai i Port Hills i te takiwā o Bromley.
  • Kua whiwhi taupori a Christchurch Central, i muri i te rironga atu o tētahi wāhanga taupori ki Christchurch East, mai i Waimakariri ka mutu mai i Port Hills i Beckenham, Sydenham, me Ōpawa.
  • Kua whiwhi taupori a Port Hills mai i Wigram i Somerfield me te takiwā o Halswell mai i Selwyn.
  • Ahakoa kua riro atu he taupori i Selwyn ki a Port Hills, kua riro mai i a ia he taupori i te taha tonga o Rakaia mai i Rangitata.

Kāore he whakarerekētanga a te Kōmihana ki ēnei rohe pōti e whitu o Te Waipounamu e whai ake nei: Nelson, Kaikōura, West-Coast Tasman, Dunedin South, Clutha-Southland, Invercargill me Ilam.

Ngā Rohe Pōti Māori

Kāore he whakarerekētanga ki Te Tai Tokerau, Tāmaki Makaurau, Hauraki Waikato, Te Tai Hauāuru me Te Tai Tonga.

He tino paku nei te whakatikatanga a te Kōmihana ki te rohenga i waenga i a Ikaroa-Rāwhiti me Waiariki, e whakawhiti ana te takiwā o Tuai ki te rohe pōti o te Waiariki.

Kāore he whakarerekētanga a te Kōmihana ki ngā ingoa rohe pōti.

He Kōrero Atu Anō

E wātea ana he mōhiohio atu anō mō ngā taiwhenua pōti 2014 katoa i www.elections.org.nz tae atu ki te Pūrongo katoa a te Kōmihana Whakatau Rohe Pōti 2014.  E wātea ana te Pūrongo hei tirotirohanga i ngā tari o te Kairēhita o ngā Kaipōti me ngā tari ā-rohe o te Puni Kōkiri.

Last updated: 17 April 2014