Te pōti i roto i te tāpaetanga pōti tuatahi mō te haki o Aotearoa.

Kāore e roa, ka pōti koe i roto i ngā tāpaetanga pōti whai mana e rua mō te haki o Aotearoa.

Tuatahi, i waenga i te 20 o Whiringa-ā-rangi me te 11 o Hakihea 2015, ka tonoa koe ki te pōti i roto i tētahi tāpaetanga pōti whai mana mō te pātai: If the New Zealand flag changes, which flag would you prefer?

Ka tonoa koe ki te whakaraupapa i ngā tauira haki rerekē e rima i tīpakohia mā te Hātepe hakaaroaro Haki mai i ērā I marohitia e ngā tāngata o Aotearoa.

Haere ki flag.govt.nz mō ngā kōrero anō e pā ana ki ngā tauira haki rerekē.

Ā, hei te Poutū-te-rangi 2016, ka tū anō he tāpaetanga pōti whai mana ki te kōwhiri i waenga i te tauira haki i tohua i te tāpaetanga pōti tuatahi me te haki o Aotearoa onāianei.

Ko te haki ka whiwhi i te nuinga o ngā pōti i te tāpaetanga pōti tuarua ka tohua ko te haki whai mana o Aotearoa.

Ka riro mā te pōhi ngā pōti e rua, nō reira me mātua whakarite koe kei te rēhita koe ki te whai wāhi mai.

Ko wai ka āhei ki te pōti?

Ka taea e koe te pōti i roto i ngā tāpaetanga pōti mēnā e āhei ana koe ka mutu kei te rēhita koe i mua i te tīmatanga o ngā pōti.

E āhei ana koe ki te rēhita me te pōti mēnā:

• 18 ō tau, neke atu rānei, ā,

• neke atu i te kotahi tau tō noho pūmau ki Aotearoa i tētahi wā, ā,

• he kirirarau koe nō Aotearoa ka mutu i haere mai koe ki Aotearoa i roto i ngā tau e toru kua hipa, tērā rānei

• he kainoho tūturu koe nō Aotearoa ka mutu i haere mai koe ki Aotearoa i roto i ngā marama 12 kua hipa*.

* Mēnā he Māori Kuki Airani koe, he Niuē, Tokerau, Ahitereiriana rānei ka taea e koe te rēhita ina noho pūmau koe ki Aotearoa mō te 12 marama. Kāore koe e herea kia whakamanahia hei kainoho tūturu kia āhei ai ki te rēhita me te pōti.

Me mātua whakarite kei te takatū koe ki te whai wāhi.

Hei pōti i te tāpaetanga pōti tuatahi, me mātua rēhita tika koe i mua o te Tāite te 19 o Whiringa-ā-rangi. Ka tukuna atu ō pepa pōti ki a koe i roto i te pōhi, nō reira he mea nui kia tōmua tō rēhita, me te whakahōu i ō taipitopito mēnā kua neke whare koe.

He māmā te rēhita, te whakahōu rānei i ō taipitopito. Hei whiwhi puka rēhita: Haere ki Enrol, Check, Update.

He māmā te pōti.

Mēnā kei te tika tō rēhita, ka whiwhi koe i tō pepa pōti i roto i te mēra mai i te Paraire te 20 o Whiringa-ā-rangi. Ko te tikanga me whiwhi koe i tō pepa pōti i mua o te Paraire te 27 o Whiringa-ā-rangi.

Kei roto i tō mōkī pōtitanga ngā kōrero e pā ana ki ngā tauira haki rerekē e rima me ngā whakaaturanga.

Ki tō pepa pōti, ka tonoa koe ki te whakaraupapa i ngā kōwhiringa tauira haki rerekē – 1, 2, 3, 4, 5 – ki te raupapa e pai ana ki a koe.

Ka tuhi koe i te “1” ki te pouaka o te kōwhiringa haki e tino pai rawa ki a koe. Kātahi ka tuhi i te “2” ki te mea tuarua e pai ana ki a koe, ā, me pērā haere.

Ka taea e koe te whakaraupapa i te maha, i te iti rānei o ngā tauira haki e hiahia ana koe, engari kaua e tīpoka he nama, e whakamahi rānei i tētahi nama kia nui atu i te kotahi te wā.

Ki te nui atu i te rima tekau ōrau, neke atu rānei, te whiwhi a tētahi kōwhiringa haki i ngā pōti tuatahi (arā ko ngā pōti kua tohua ki te “1”) ka tohua ki te tatau tuatahi.

Ki te kore e whiwhi tētahi haki i te rima tekau ōrau, neke atu rānei o ngā pōti tuatahi, ka makere mai te haki he iti rawa ngā pōti “1” ka riro ana pōti ki te haki tuarua i tohua e te kaipōti. Ka pēnei haere kia eke rā anō i tētahi haki te 50 ōrau, neke atu rānei o ngā pōti.

Te whakahoki I tō pepa pōti mai I Aotearoa.

Ki te kore koe e whiwhi i tētahi mōkī i mua o te Paraire te 27 o Whiringa-ā-rangi, haere ki elections.org.nz, waea koreutu rānei ki 0800 36 76 56 kia riro mai he pepa whakakapi.

Ka taea anō e koe he pepa whakakapi ki te hē tō tuhi, ki te ngaro, ki te tūkinohia rānei tō pepa.

Mērahia atu tō pōti ina oti i a koe tō kōwhiringa. Kei roto i tō mōkī pōti tētahi kōpaki whakahoki Freepost.

Me mātua whakahoki e koe tō pepa pōti mā te mēra. Mēnā kei te pōhi koe mai i Aotearoa me whakarite koe kei roto tō pepa pōti i tētahi pouakamēra New Zealand Post i mua o te Tūrei te 8 o Hakihea kia mātua tae atu i te wā tika.

Kei te haere ki tāwāhi?

Mēnā kei te rēhita koe, ā, i tukuna mai he wāhi noho pōhi nō tāwāhi ka tukuna atu ō pepa pōti ki taua wāhi noho. Otirā ka taea e koe te whakarite kia tukuna atu ō pepa pōti ki a koe mai i Aotearoa, haere rānei ki elections.org.nz mō ētahi atu kōwhiringa.

E toru ngā huarahi hei whakahoki i ō pepa pōti mai i tāwāhi. Ka taea te tuku mā te mēra, engari me mātua whakarite ka tohua te rā ki te mēra i mua o te Tāite te 10 o Hakihea. Ka taea anō te whakahoki mā te waea whakaahua, te tukuatu haumarutia rānei i mua o te 7pm o te Paraire te 11 o Hakihea (wā Aotearoa).

Haere ki elections.org.nz/overseas, waea koreutu rānei ki 0800 36 76 56 (+64 9 909 4182) mō ngā whakamāramatanga mō te pōti i tāwāhi.

Kei te hiahia āwhina koe ki te pōti?

Mēnā kei te hiahia āwhina koe ki te pānui, te tuhi rānei ki tō pepa pōti ka taea e koe te tono tētahi tangata, tae atu ki tētahi hoa, tētahi o te whānau rānei, ki te āwhina i a koe.

Ka taea ngā pōti ā-waha mō ngā kaipōti kāpō, he mate te kite, he momo hauā rānei e kore e taea e rātau te whakakī I tā rātau pepa pōti. Haere ki elections.org.nz, waea koreutu rānei ki 0800 36 76 56 mō ngā whakamāramatanga mō te pōti ā-waha.

Ngā hua.

Ka whakapuakina ngā hua tōmua o te tāpaetanga pōti tuatahi i muri o te 7pm Paraire 11 o Hakihea. Ka whakapuakina te hua whakamutunga hei te 15 o Hakihea ina tukatukahia katoahia ngā pōti i tae mai i roto i te wā tika. Ka wātea mai ngā hua I electionresults.govt.nz

 

Last updated: 11 December 2015