Ko te wā Whakamutunga ki te Kōwhiri i te Rārangi Māori, i te Rārangi Whānui Rānei

Media releases Māori Electoral Option 2013

Kua tata pau te wā kia whai wāhi ki te Kōwhiringa Pōti Māori 2013.

"Mēnā he Māori koe i te rārangi pōti, ko te wā whakamutunga tēnei māu hei whiriwhiri i te rārangi pōti e pōti ai koe, arā, te rārangi Māori, te rārangi Whānui rānei", hei tā Murray Wicks, te Kaiwhakahaere ā-Motu o ngā Ratonga Rēhita. “Kei a koe tae atu ki tēnei Rāapa, 24 Hōngongoi, nā, ki te pīrangi koe ki te huri, meatia ināianei.”

I te wā o te Kōwhiringa Pōti Māori, ka taea e te Māori te whiriwhiri ki te Rārangi Pōti Māori rātou, te Rārangi Pōti Whānui rānei ina pōti rātou i ngā Pōtitanga Whānui e rua e whai ake, i ngā pōtitanga motuhake katoa hoki.

"Kia mahara, kotahi anake tō kōwhiringa i roto i te wā o te Kōwhiringa," hei tā Murray Wicks. "Kāore koe e whai wā anō ki te huri rārangi kia tū anō te Kōwhiringa Pōti Māori, kua whakatakotoria mō te tau 2018.

“Ina pīrangi koe te huri, ā, kāore anō kia tukua mai e koe he puka kua hainatia, kia tere. Kia mea ai i tō kōwhiringa me whakahoki mai ki a mātou tō puka Kōwhiringa Pōti Māori tae ki te Rāapa 24 Hōngongoi. Mehemea kua ngaro tō puka Kōwhiringa Pōti Māori, kāore rānei i whiwhi ki tētahi, me whakakī koe i tētahi puka rēhita.”

Hei whiwhi puka rēhita, haere ki elections.org.nz, pato koreutuhia tō ingoa me tō wāhi noho ki 3676, waea ki 800 36 76 56, haere rānei ki tētahi PostShop.

Kei www.elections.org.nz/events/meo-2013 ētahi atu kōrero mō te Kōwhiringa Pōti Māori .

Tuhipoka: Ka wātea ngā otinga o te Kōwhiringa Pōti Māori i www.elections.org.nz mai i te poupoutanga o te rā, Rāhina 29 Hōngongoi 2013.