Kōwhiringa Pōti Māori – koinei tō wā ki te kōwhiri

Media releases Māori Electoral Option 2018

Ka tīmata te Kōwhiringa Pōti Māori 2018 ā tērā marama, e whai wāhi ai ngā kaipōti Māori ki te kōwhiri i waenga i te rārangi Māori, rārangi Whānui rānei.

Ka tū te Kōwhiringa mai i te 3 o Paengawhāwhā ki te 2 o Hereturikōkā.  Ka tukuna ngā mōkī mōhiohio i te tīmatanga o Paengawhāwhā ki ngā kaipōti i kī he Māori rātau i tō rātau rēhitatanga.  Kei roto i te mōkī ko tētahi reta e whakaū ana i te rārangi pōti kei runga rātau i tēnei wā me te tuku wāhanga mō rātau ki te kōwhiri ko tēhea te rārangi e hiahia ana rātau.  

"He kōwhiringa nui tēnei mā ngā kaipōti Māori i te mea ka whakatau mēnā ka eke atu rātau ki te rārangi Māori, rārangi Whānui rānei mō ngā pōtitanga whānui e rua e whai ake – koinei tō wā ki te kōwhiri," te kī a Mandy Bohté, Kaiwhakahaere ā-Motu o te Rēhita me te Whitiwhiti ā-Iwi mā te Kaitiaki Take Kōwhiri. 

Ka pōti ngā kaipōti kei te rārangi Māori mō tētahi kaitono i tētahi rohe pōti Māori, ā, ko ngā kaipōti kei te rārangi Whānui ka pōti mō tētahi kaitono kei tētahi rohe pōti Whānui.   Ahakoa te rārangi kei runga te kaipōti, ka kōwhiri ia mai i aua rārangi tōrangapū ōrite ina tukuna e ia tāna pōti rōpū.

Ka āwhina ngā hua o te Tatauranga Whānui 2018 me te Kōwhiringa Pōti Māori hei whakarite i te maha o ngā rohe pōti Māori me te Whānui mō ngā pōtitanga whānui e rua e whai ake.

Ka whakarewahia ōkawatia te Kōwhiringa ā te Rāhoroi te 24 o Poutūterangi i te whakataetae Kapa Haka a Te Tai Tokerau i Whāngārei, ā, ka tīmata ngā pānuitanga ā te Rātapu te 25 o Poutūterangi e whakaatu ana i ngā mahi a te tohunga toi kirikiri a Marcus Winter.  Ka āwhina anō ngā tāngata pāpāho rongonui a William Waiirua, Stacey Morrison, Tawaroa Kāwana me Puawai Taiapa i te whakatairanga.

 "Ka haere ngā rōpū o te Kaitiaki Take Kōwhiri ki ngā huihuinga pērā i ngā whakataetae Kapa Haka ā-rohe i roto i ngā marama e whā e whai ake mō ngā mahi kanohi ki te kanohi hei whakaputa whānui i te kōrero mō te Kōwhiringa," te kī a Bohté.  Mō ētahi atu kōrero, haere ki www.maorioption.org.nz.