GAGANA SĀMOA Resources

Language

Information about enrolling and voting in Samoan.

Are you ready to enrol? Click here to enrol now!

Palota ile Faigapalota Lautele 2017

Ole Aso Palota ole aso Toonai 23 o Setema. E amata mafai ona e palota ile aso Gafua 11 o Setema.

Ole palota ose auala tāua tele e faaali ai sou finagalo i mataupu e aofia ai oe, o au uo ma lou aiga. A e palota, e mafai ona e filifili tagata ma patī e fai ma ou sui ile Palemene ma o le a o latou faia faaiuga e aafia ai lou olaga. E mafai ona e faamautūina o loo faafofogaina lou leo e ala ile faamautinoa o lau lesitala ma palota ile palota ole tausaga nei.

E manaomia lou lesitala ina ia mafai ai ona e palota

E na‘o tagata ua lesitala e mafai ona palota ile Faigapalota Lautele.
E tatau ona e lesitala pe afai o oe:

  • ua 18 ou tausaga pe sili atu, ma
  • ose tagata sitiseni Niu Sila pe nofomau foi o Niu Sila, ma
  • sa e nofo i Niu Sila ile silia ma le tausaga ise taimi o lou olaga.

Lesitala ae lei oo ile aso 23 o Aukuso ona lafoina atu lea ia te oe o mea uma e manaomia e faafaigofie ai lau palota, e aofia ai ma lau pepa ole EasyVote. O lau pepa ole EasyVote o le a faafaigofie ai ma vave le faiga o lau palota.

E mafai ona e lesitala ile mae‘a ole aso 23 o Aukuso ae o le a lē maua atu la sau pepa ole EasyVote.

E mafai ona e lesitala e oo atu lava ile aso Faraile 22 o Setema, e aofia ai ma soo se nofoaga palota lava ua faatulaga e fai muamua ai lau palota ae lei oo ile aso tonu ole palota, ae lē mafai ona e toe lesitala ile aso ole palota.

E faigofie lava ona lesitala lou suafa pe toe faafou ou faamaumauga. Ina ia maua sau pepa e faatumu ai lau lesitala:

  • Asiasi ile elections.org.nz
  • Telefoni vilifua 0800 36 76 56
  • E text fua lou suafa ma lou tuatusi ile 3676
  • Agai i soo se PostShop

Afai o oe ose Maoli ma ole uluai taimi lea ua e lesitala ai, e iai le avanoa ete filifili ai pe ete lesitala ile lola palota a Maoli poo le lola palota Lautele.

Palota ile Faigapalota Lautele 2017

E mafai ona e palota mai le aso Gafua 11 o Setema agai ile aso Faraile 22 o Setema i soo se nofoaga palota lava ua faatulaga e fai muamua ai lau palota ae lei oo ile aso tonu ole palota. E mafai foi ona e lesitala, siaki pe toe faafou ou faamaumauga ile taimi lava lea e tasi.

Ile aso ole palota, aso Toonai 23 o Setema, o le a matala uma nofoaga palota mai le 9 ile taeao ile 7 ile afiafi. E tatau ona e lesitala ao lei oo ile aso Faraile 22 o Setema. E lē mafai ona e lesitala ile aso tonu ole palota.

O faamatalaga e faatatau poo fea ao afea e mafai ai ona palota, ma poo ai e mafai ona e palota ai, o le a avanoa atu mo oe mai le aso Lulu 30 o Aukuso ile elections.org.nz pe vili le 0800 36 76 56. O le a aofia atu ai foi i au pepa ole EasyVote.

E mafai ona e palota i soo se nofoaga palota ile atunuu, peitai e ono manaomia lou faatumu o seisi pepa faaopoopo pe afai ete palota mai i fafo atu o lou itumalo.

Le auala e palota ai

Afai e iai sau pepa ole EasyVote, alu ma ave ile taimi e fai ai lau palota ma tuu atu ile tagata o le a tuuina ane lau pepa palota. O le a fesoasoani lea ile sailiga o oe ile lola palota. O le a fesili atu ia te oe e faamaonia ai lou igoa ma tuuina atu loa ia te oe lau pepa palota.

Afai e leai sau pepa ole EasyVote, e manaomia ona e ta‘u atu lou igoa atoa ma lou tuatusi ile tagata o le a tuuina ane lau pepa palota.

Ole a iai se tagata ile nofoaga palota e faasino ane ia te oe le mea e fai ma le vaega ete alu iai.

Ave lau pepa palota ile nofoaga faapitoa o loo iai le fāata palota (voting screen).

E tofu tagata palota taitasi ma lana palota mo se vaega ma le palota mo se itumalo faapalota. I luga o lau pepa palota, tuu se togi i autafa ole igoa ole vaega faaupufai ete filifili iai ma tuu se togi i autafa ole igoa ole sui faatū e aupito sili ona e manao e tulai e avea ma sui ole tou pitonuu.

Ete filifili mai lava ile lisi lava lea e tasi o vaega faaupufai tusa pe ete ile lola palota Lautele poo le lola palota a Maoli.

Afai o loo e lesitala ile lola palota a Maoli, o le a e palota foi mo se sui o loo tauva mai ise itumalo faapalota a Maoli, ae afai o loo e lesitala ile lola mo le faigapalota Lautele, o le a e palota foi mo se sui o loo tauva mai ise itumalo mo le faigapalota Lautele.

Ole palota mo le patī e matele ina filifili mai ai le aofai o nofoa e maua e vaega faaupufai taitasi ile Palemene. O vaega faaupufai e telē lo latou sao ile palota mo patī o le a tele o latou nofoa ile Palemene.

Lē mafai ona oo atu ile nofoaga palota?

Afai o e ise fale mo tagata matutua poo se falemai, o le a auina atu e le Komisi o Faigapalota ni ‘au e kiliva atu le auaunaga. Afai e lē mafai ona e oo ane ise nofoaga palota, e mafai ona maua se fesoasoani mo oe ete palota ai. E mafai ona e maua nisi faamatalaga ile elections.org.nz pe vili le 0800 36 76 56.

Palota mai atunuu i fafo

Afai o loo e i fafo atu ole atunuu e mafai lava ona e palota. Mai le aso Lulu 6 o Setema e mafai ona maua atu au pepa palota i auala o loo ta‘ua i lalo:

  • Download pepa palota mai le elections.org.nz
  • Fesili mai ia matou mo pepa palota e lafo atu ile meli
  • Fai ane lau palota i ofisa o sui ole malo o loo iai ile tele o atunuu. Siaki le elections.org.nz mo nofoaga o loo iai ofisa o sui ole malo i isi atunuu.

O manaomia se fesoasoani ile faiga ole palota?

Afai e manaomia se fesoasoani ete faitau ai pe maka se pepa palota a oe, sau uo, se tasi o lou aiga, e mafai ona fesoasoani atu se sui ole ofisa o faigapalota. O lea tagata e mafai ona alu faatasi ma oe i tua atu ole fāata palota, ma e mafai ona ia faitau ane ia te oe upu ma faamatalaga o loo i luga ole pepa palota. E mafai foi ona ia makaina lau pepa palota e fua agai i au faatonuga. Ae lē mafai ona ia ta‘uina atu ia te oe poo ai e ao ona e palota iai.

O tagata palota e pō le vaai, lē lelei le vaai pe iai seisi manaoga faapitoa e lē mafai ai ona o latou makaina a latou pepa palota e aunoa ma se fesoasoani, e mafai ona palota mai ile telefoni ua faatulaga faapitoa mo le palota.

Nisi faamatalaga

Mo nisi faamatalaga faatatau ile lesitala ma le palota:

Afai o e silafia se tasi e ono aogā iai lenei faamatalaga, faamolemole ia logo atu ia i latou.

O faamatalaga e faatatau ile lesitala ma le palota o loo avanoa i gagana e 27 ile elections.org.nz/languages.

Your guide to the 2017 General Election (PDF 522.09 KB)
Everything you need to know about enrolling to vote (PDF 1.13 MB)
Everything you need to know about the unpublished roll (PDF 1 MB)