Enrol and Vote as a New Zealand Māori - Te Reo

Rēhita me te Pōti hei Māori nō Aotearoa

Kei a koe te tikanga hei Māori nō Aotearoa, hei uri Māori nō Aotearoa rānei, ki te rēhita ki te rārangi pōti Māori, rārangi pōti Whānui rānei.

Mēnā kei runga koe i te rārangi pōti Whānui, ka pōti koe mō tētahi MP kei te rohe pōti Whānui i te Pōtitanga Whānui e whai ake.

Mēnā kei runga koe i te rārangi pōti Māori, ka pōti koe mō tētahi MP kei te rohe pōti Māori i te Pōtitanga Whānui e whai ake.

Kāore he here mō te kōwhiri i tō Pōti Rōpū ahakoa kei tēhea momo rārangi koe. He ōrite katoa te rārangi rōpū tōrangapū ka whiwhi ia kaipōti mō te whiriwhiri i te Pōti Rōpū ahakoa kei tēhea rārangi pōti te tangata, ahakoa kei hea ia e noho ana.

Ka whai pānga pea tō kōwhiringa rārangi pōti ki tō pōti i ngā pōti kaunihera mēnā kua waihangatia mai e tō kaunihera he Rohe Pōti Māori i raro i te Local Electoral Act 2001.

Ki te whakarite koe ki te rēhita ki te Rārangi Māori ka whakatau tō kaunihera ki te waihanga i tētahi Rohe Pōti Kaunihera Māori, me pōti koe mō te kaitono i roto i te Rohe Pōti Kaunihera Māori.

He Māori ahau. Me rēhita au ki te Rārangi Māori?

Kāo. Mēnā kei te rēhita koe hei kaipōti mō te wā tuatahi ka taea e koe te whiriwhiri mēnā e hiahia ana koe ki te rēhita ki te rārangi Whānui, Māori rānei mā te waitohu i te taha e hāngai kei te puka rēhita.

Ina rēhita koe mō te wā tuatahi, ka taea e koe te huri i tō momo rārangi ia rima tau i te Kōwhiringa Pōti Māori anake. Rapu mōhiohio anō mō te Kōwhiringa.

He Māori Kuki Airani, nō Te Moananui-a-Kiwa rānei ahau. Ka āhei atu au ki te rārangi Māori?

Kāo.  Mō ngā Māori o Aotearoa me ngā uri Māori o Aotearoa anake.  Ko ngā Māori Kuki Airani me ērā o Te Moananui-a-Kiwa e āhei ki te rēhita me haere kē ki runga i te rārangi Whānui.

He aha te tikanga me whai rārangi Māori tātau?

I whakatūhia ngā tūru Māori e whā e te Pāremata o Aotearoa 1867 kia whai māngai te iwi Māori ki roto o te Pāremata. I te tau 1975 i tīmatahia e te kāwanatanga te Kōwhiringa Pōti Māori kia whai i te taha (i muri rānei) o ia tatauranga whānui. Nā tēnei i āhei ngā kaipōti Māori te kōwhiri mēnā ki ngā tūru whānui, Māori rānei rātau pōti ai.

I pupuritia ngā tūru Māori i raro i te pūnaha pōti MMP i te whakaurunga mai i ngā tau o te 1990. I āhei anō te whakapiki, te whakaiti rānei i te maha o ngā rohe pōti e ai ki ngā hua o ia kōwhiringa pōti Māori.

I whakahaerehia tētahi Kōwhiringa Motuhake whai muri i te tāpaetanga pōti 1993 i whakauruhia ai a MMP hei pūnaha pōti mō Aotearoa. Nā tēnei Kōwhiringa i tino piki ai te maha o te Māori ki te Rārangi Pōti Māori, whāia ka piki te maha o ngā rohe pōti Māori mai i te whā, i raro i te pūnaha o mua, ki te rima. I piki anō te maha o ngā rohe pōti Māori i ngā Kōwhiringa Pōti Māori o muri mai ki te whitu.

I mua o te pōtitanga MMP tuatahi i te tau 1996 i piki te maha o ngā tūru Māori ki te rima, he tuatahi tēnei mō ōna tau 129. E whitu i te tau 2002.

I ēnei rā, he rerekē ngā momo MP:

  • Ngā MP Rohe Pōti - pōti ai koe mō ēnei i runga anō i tō wāhi noho me tō momo rārangi (Whānui, Māori rānei) Ko ngā kaipōti kei te rārangi Whānui, tae atu ki ngā Māori e rēhita ana ki te rārangi Whānui, ka pōti MP hei māngai mō ngā rohe pōti Whānui.  Ko ngā kaipōti kei te rārangi Māori ka pōti MP hei māngai mō ngā rohe pōti Māori.
  • Ngā MP Rārangi, ā-Rōpū rānei - ko ngā tāngata katoa e rēhita ana ki te pōti ka pōti mō ēnei MP mā te pōti rōpū. Kāore he here mō te kōwhiri i tō pōti rōpū ahakoa kei tēhea rārangi koe.

 

Last updated: 20 October 2014